Беларускі «МАЗ» і кітайская кампанія Zoomlion ствараюць сумеснае прадпрыемства па выпуску спецыяльнай тэхнікі для рынкаў краін СНД і ЕС. Пра гэта паведаміў топ-менеджэр "МАЗ" і будучы кіраўнік сумеснага прадпрыемства Юрый Півавараў.
Сумеснае прадпрыемства стане рэзідэнтам свабоднай эканамічнай зоны "Магілёў". Прадпрыемства будзе збіраць аўтакраны, аўтабетонанасосы, аўтамабільныя змяшальнікі і камунальную тэхніку. Спецыяльныя машыны будуць выпускаць на заводзе "Магілёўтрансмаш», які ўваходзіць у холдынг «Белаўтамаз". Мінскі аўтазавод прадаставіць шасі, а Zoomlion – навясное абсталяванне.
Асноўнымі рынкамі збыту выступяць Расія, Украіна і Казахстан, а таксама краіны Еўрасаюза – Літва, Латвія, Польшча, Балгарыя і Венгрыя. Апроч таго, беларуска-кітайскую спецтэхніку плануюць пастаўляць у краіны Блізкага Усходу, Афрыкі і Лацінскай Амерыкі. - Р -