Брытанскі ўрад у чацвер апублікаваў "Белую кнігу" аб выхадзе краіны з ЕС, якая стала прававым дакументам, што вызначыў мэты ўрада ў працэсе выхаду з ЕС. У ёй падкрэсліваецца неабходнасць ажыццяўлення спакойнага і спарадкаванага выхаду краіны з ЕС. Гэта азначае, што Брытанія зрабіла першы крок у напрамку да афіцыйнага выхаду з ЕС.
У "Белай кнізе" пералічаныя 12 асноўных прынцыпаў праграмы ўрада па выхадзе з ЕС, большасцьз іх - дэталізацыя і дадатак мэтаў і асноўных прынцыпаў, выкладзеных 17 студзеня прэм'ер-міністрам краіны Тэрэзай Мэй у яе выступленні.
Згодна з "Белай кнігай" Вялікабрытанія выйдзе з адзінага еўрапейскага рынку і мытнага саюза ЕС, будзе імкнуцца да ўстанаўлення стратэгічнага партнёрства новага тыпу з ЕС, у тым ліку, заключыць з ім усёабдымнае гандлёвае і мытнае пагадненне, прыкладзе намаганні па дасягненні з іншымі краінамі свету новых гандлёвых пагадненняў; Вялікабрытанія створыць новую сістэму рэгулявання міграцыі з ЕС, а таксама дасць дастатковы пераходны перыяд прадпрыемствам; забяспечыць правы і інтарэсы грамадзян Вялікабрытаніі ў краінах ЕС; Вялікабрытанія выйдзе з юрыдычнай сістэмы Еўрапейскага суда, пры гэтым будзе імкнуцца да стварэння новага механізму ўрэгулявання гандлёвых спрэчак, працягне супрацоўніцтва з ЕС у галіне барацьбы са злачыннасцю і тэрарызмам.
У прадмове "Белай кнігі" Тэрэза Мэй адзначыла, што Вялікабрытанія спадзяецца на дасягненне поспехаў на перамовах па выхадзе з ЕС. Паводле яе слоў, ніжняя палата брытанскага парламента ўжо прагаласавала за праграму ўрада па выхадзе з ЕС, што адпавядае вынікам галасавання народа краіны. "Мы не толькі ўсталюем новае партнёрства з ЕС, але і створым больш магутную і больш справядлівую і глабалізаваную Вялікабрытанію".
Міністр па справах Brexit Дэвід Дэвіс у "Белай кнізе" адзначыў, што брытанскі ўрад у сакавіку гэтага года пачне рэалізацыю 50-га артыкула Лісабонскай дамовы і тым самым пакладзе афіцыйны пачатак працэсу выхаду з ЕС.