Пытанне аб статусе Іерусаліма з'яўляецца складаным і адчувальным, усе бакі павінны быць абачлівымі ў сваіх учынках. Пра гэта заявіў у сераду афіцыйны прадстаўнік МЗС КНР Гэн Шуан.
Адказваючы на пытанне журналіста пра тое, што паводле паведамлення СМІ, высокапастаўленыя чыноўнікі ЗША ў аўторак заявілі, што прэзідэнт Дональд Трамп 6 снежня можа прызнаць Іерусалім сталіцай Ізраіля, Гэн Шуан адзначыў, што Кітай прыняў да ўвагі адпаведнае паведамленне і ўважліва сочыць за развіццём падзей, а таксама занепакоены магчымым абвастрэннем супярэчнасцяў у рэгіёне.
Паводле яго слоў, пытанне аб статусе Іерусаліма з'яўляецца складаным і адчувальным. Усе бакі павінны дзеля падтрымання міру і стабільнасці ў рэгіёне быць абачлівымі ў сваіх учынках, пазбягаць аказання ўплыву на асновы вырашэння пытання аб Палестыне і не дапускаць з'яўлення новых канфрантацый.
Гэн Шуан сказаў, што Кітай няўхільна і цвёрда падтрымлівае і прасоўвае мірны працэс на Блізкім Усходзе, падтрымлівае стварэнне незалежнай дзяржавы Палестына са сталіцай ва Усходнім Ерусаліме ў межах 1967 года, якая валодае поўным суверэнітэтам.
Кітай заклікае ўсе бакі, у адпаведнасці з рэзалюцыямі ААН, імкнуцца да вырашэння супярэчнасцяў шляхам перамоў, а таксама да забеспячэння міру і стабільнасці ў рэгіёне, заявіў кітайскі дыпламат.