У амерыканскім штаце Фларыда ўзятых у заложнікі чацвярых дзяцей у панядзелак знайшлі мёртвымі, адзін паліцэйскі пацярпеў. Пра гэта паведамілі мясцовыя ўлады.
Адрэагаваўшы на паведамленне аб хатнім гвалце ў нядзелю ўвечары, паліцэйскія горада Арланда выявілі, што ўзброены мужчына забарыкадзіраваўся ў кватэры з чатырма дзецьмі.
Паліцэйскія ўварваліся ў кватэру ў панядзелак увечары пасля 24-гадзіннага супрацьстаяння і выявілі, што ўсе дзеці ва ўзросце аднаго, шасці, дзесяці і адзінаццаці гадоў загінулі.
Шэф паліцыі Арланда Джон Міна ў поўнач паведаміў на брыфінгу, што ўсе чацвёра дзяцей былі забітыя падазраваным, на што паказваюць відавочныя агнястрэльныя раненні.
Ён дадаў, што час смерці дзяцей незразумелы.