У бліжэйшы час прэзідэнт Украіны Пётр Парашэнка мае намер падаць на разгляд парламента папраўку ў Канстытуцыю, якая замацуе ўступленне ў НАТА і Еўрапейскі Саюз у якасці стратэгічных мэт дзяржавы. Пра гэта 28 чэрвеня паведаміла прэс-служба Пятра Парашэнкі.

Выступаючы на ўрачыстасцях з нагоды Дня Канстытуцыі, прэзідэнт Украіны звярнуў увагу на тое, што неабходнасць унесці змены ў асноўны закон выклікана цэлым шэрагам фактараў. У прыватнасці, сяброўства ў НАТА і ЕС адпавядае нацыянальным інтарэсам Украіны і падтрымліваецца большай часткай яе насельніцтва. Парашэнка таксама выказаў упэўненасць, што Вярхоўная Рада ўхваліць яго ініцыятыву.

У канцы 2014 года Украіна адмовілася ад свайго пазаблокавага статусу і ўзяла курс на збліжэнне з НАТА. 1 верасня 2017 года ўступіла ў поўную сілу Пагадненне аб асацыяцыі паміж Украінай і ЕС. - Р -