Першы ўзор кітайскага самалёта-амфібіі AG600 у нядзелю здзейсніў пералёт з горада Чжухай правінцыі Гуандун у горад Цзінмэнь правінцыі Хубэй, дзе запланаваны яго першыя выпрабаванні па ўзлёце з паверхні вады. Пра гэта паведамілі інфармагенцтву Сіньхуа ў Кітайскай карпарацыі авіябудаўнічай прамысловасці / AVIC /.

Самалёт з бартавым нумарам 001 праляцеў над правінцыямі Гуандун, Хунань і Хубэй і ў 09:43 па пекінскім часе ўдала прызямліўся ў аэрапорце Чжанхэ горада Цзінмэнь. Перабазіраванне паветранага судна азначае пачатак новага этапу яго выпрабаванняў, удакладнілі ў AVIC.

Гідрасамалёт AG600 распрацаваны для задавальнення патрэб грамадзянскай авіяцыі. Ён сканструяваны спецыяльна для барацьбы з ляснымі пажарамі і правядзення выратавальных аперацый на вадзе.

Першы ўзлёт AG600 з сушы адбыўся 24 снежня 2017 года на базе ў горадзе Чжухай.