Улады ЗША ў аўторак даручылі эвакуіраваць больш за 1,5 млн чалавек, якія пражываюць на атлантычным узбярэжжы краіны, з-за набліжэння ўрагану "Флорэнс", якому нададзены чацвёрты ўзровень з пяці магчымых.
Паводле прагнозаў Нацыянальнага ўраганнага цэнтра ЗША, стыхія абрынецца на ўсходняе ўзбярэжжа позна ўвечары ў чацвер або рана раніцай у пятніцу па мясцовым часе. Наступствы праліўных дажджоў і вятроў могуць вар'іравацца ад перабояў у падачы электраэнергіі і пашкоджанні інфраструктуры да паводак, якія могуць прывесці да гібелі людзей і значнай матэрыяльнай шкоды. Як паведамілі ў Федэральным агенцтве па надзвычайных сітуацыях, на дадзены момант ураган не паказвае прыкмет паслаблення і з вялікай верагоднасцю стане самым моцным за апошнія дзесяцігоддзі.
У сувязі з гэтым надзвычайнае становішча было абвешчана ў Паўднёвай Караліне, Паўночнай Караліне, Вірджыніі, Мэрылэндзе і Вашынгтоне.
Прэзідэнт ЗША Дональд Трамп у аўторак заявіў, што адміністрацыя "абсалютна і цалкам гатовая" сустрэць стыхію, адмяніўшы запланаваныя на чацвер і пятніцу мітынгі перад сваімі прыхільнікамі.
Як адзначаюць мясцовыя СМІ, порт Вірджыніі абвясціў пра поўнае спыненне працы з серады; дзесяткі караблёў ВМС ЗША былі выведзеныя з порта, па якім у хуткім часе можа ўдарыць ураган.