Прэзідэнт ЗША Дональд Трамп падпісаў указ, які прадугледжвае ўвядзенне санкцый у дачыненні да замежных урадаў, кампаній, фізічных асоб, што ўмешваюцца ў амерыканскія выбары.
Згодна з указам, дырэктар нацыянальнай разведкі ЗША на працягу 45 дзён пасля правядзення выбараў павінен падрыхтаваць справаздачу аб тым, ці былі выяўлены прыкметы замежнага ўмяшальніцтва. Уся сабраная інфармацыя будзе перададзена Міністэрству юстыцыі і Міністэрству ўнутранай бяспекі, у якіх таксама будзе 45 дзён, каб вызначыць, які ўплыў аказала гэта ўмяшальніцтва, а таксама вызначыць неабходнасць увядзення санкцый. Затым на гэтай падставе Дзярждэпартамэнт ЗША і Міністэрства фінансаў змогуць увесці абмежавальныя меры ў сувязі з умяшальніцтвам.
Дырэктар нацыянальнай разведкі ЗША Дэніэл Коўтс раней у сераду заявіў, што прамежкавыя выбары ў Кангрэс, якія адбудуцца ў лістападзе, і прэзідэнцкія выбары ў 2020 годзе будуць у цэнтры ўвагі. Гэты ўказ выкарыстоўваецца і ў дачыненні да ўсіх дзеянняў ўмяшальніцтва ў выбары ў ЗША.
Памочнік прэзідэнта ЗША па нацыянальнай бяспецы Джон Болтан адзначыў, што патэнцыяльныя абмежавальныя меры ўключаюць замарожванне актываў на тэрыторыі ЗША, забарону на атрыманне інвестыцый ад грамадзян і фінансавых устаноў ЗША. Ён падкрэсліў, што гэты ўказ не накіраваны супраць пэўнай краіны. - Р -