Прадукты і сувеніры з Беларусі сталі лёгкадаступнымі для мільёнаў жыхароў кітайскага мегаполіса Чунціна на паўднёвым захадзе краіны. Беларускі цэнтр турыстычнай і культурнай прадукцыі, размешчаны ў гарадскім раёне Юйбэй, расчыніў свае дзверы для наведвальнікаў.
На цырымоніі адкрыцця цэнтра, якая адбылася ў канцы мінулага тыдня ў раёне Юйбэй, прысутнічалі высокапастаўленыя асобы з Міністэрства сельскай гаспадаркі і харчавання Беларусі, выканкама Мінскай вобласці, пасольства Беларусі ў Кітаі, а таксама з адміністрацыі Чунціна.
Паводле звестак мясцовых СМІ, бакі на цырымоніі заключылі мемарандум аб узаемаразуменні ў турыстычным супрацоўніцтве паміж Чунцінам і Мінскай вобласцю.
На фоне будаўніцтва "Пояса і шляху" Чунцін бесперапынна актывізуе ўзаемадзеянне з Беларуссю. У ліпені гэтага года ў Мінску адбыліся Дні культуры і турызму Чунціна. У рамках мерапрыемства бакі дамовіліся аб узаемным адкрыцці цэнтраў турыстычнай і культурнай прадукцыі.
Новы цэнтр, як заявіў намеснік старшыні ўрада раёна Юйбэй Янь Ціюн, дазволіць бакам паглыбіць узаемнае разуменне і ўмацаваць сяброўства паміж народамі. У цэнтры таксама прадастаўляецца інфармацыя аб турыстычных прадуктах і мерапрыемствах у Беларусі.
10 жніўня гэтага года ў сілу ўступіла міжурадавае пагадненне паміж Кітаем і Беларуссю пра бязвізавы рэжым для ўладальнікаў агульнаграмадзянскіх пашпартоў.
"Згодна з мемарандумам аб узаемаразуменні, мы з калегамі з Беларусі будзем супрацоўнічаць у сферы культурнага абмену, адкрыцця авіярэйсаў і развіцця турыстычнага бізнесу", - распавялі ў турыстычным ведамстве Чунціна.