Кітай рашуча пярэчыць супраць спробаў СМІ і афіцыйных асоб пэўных краін "палітызаваць і стыгматызаваць" яго намаганні і меры па барацьбе з тэрарызмам і экстрэмізмам у Сіньцзян-Уйгурскім аўтаномным раёне, заявіла ў панядзелак прадстаўнік МЗС КНР Хуа Чуньін.
Такім чынам яна пракаментавала на чарговай ведамаснай прэс-канферэнцыі нядаўнія паведамленні СМІ ЗША і шэрагу іншых заходніх краін, якія вінавацяць Кітай у тым, што ён займаецца "сачэннем, затрыманнямі і асіміляцыяй" у Сіньцзяне і іншых мусульманскіх рэгіёнах.
"Гэтыя сенсацыйныя паведамленні з'яўляюцца безадказнымі, яны альбо грунтуюцца на чутках, альбо спасылаюцца на ілжывыя ці выдуманыя крыніцы", - заявіла яна, дадаўшы, што некаторыя заходнія палітыкі і СМІ дапусцілі "фундаментальную памылку", вызначаючы кітайскія намаганні па барацьбе з тэрарызмам і падтрыманні стабільнасці , як накіраваныя супраць уйгураў ці мусульман.
"Кітайскі ўрад нязменна выступае супраць таго, каб тэрарызм звязвалі з пэўнымі нацыянальнасцямі або рэлігіямі", - падкрэсліла Хуа Чуньін.
Паводле яе слоў, пераважная большасць уйгураў жыве ў гармоніі з прадстаўнікамі іншых 55 нацыянальнасцяў, якія насяляюць Кітай, і яны задаволеныя сваім жыццём.
Кітай прыняў шэраг мер па вяртанні да нармальнага жыцця тых, хто трапіў пад уплыў тэрарызму і рэлігійнага экстрэмізму, у тым ліку праз прафесійна-тэхнічную адукацыю і падрыхтоўку, заявіла дыпламат.
Яна таксама адзначыла, што за апошнія 24 месяца не было зафіксавана ніводнага гвалтоўнага тэрарыстычнага нападу, і назвала гэта доказам пазітыўных і прыкметных вынікаў, дасягнутых Сіньцзянам у барацьбе з тэрарызмам.
"Мы выступаем супраць падвойных стандартаў, якія ўжываюцца СМІ і афіцыйнымі асобамі пэўных краін, і іх зласлівых нападак на палітыку Кітая ў дачыненні да нацменшасцяў і рэлігіі", - заявіла Хуа Чуньін, заклікаўшы іх аб'ектыўна і непрадузята ставіцца да мер Кітая па падтрыманні бяспекі і стабільнасці ў Сіньцзяне .