Напярэдадні ў рамках Пекінскага кінафестывалю адбылася прэзентацыя ўкраінскай кінаіндустрыі. Арганізатарам мерапрыемства «Украіна – твой пункт прызначэння» (Ukraine is Your Destination) выступіла Украінская кінаасацыяцыя пры падтрымцы Дзяржаўнага агенцтва Украіны па пытаннях кіно. Гасцям распавялі аб развіцці кінаіндустрыі ва Украіне, стане спраў на ўкраінскім кінарынку і аб супрацоўніцтве Кітая і Украіны ў гэтай сферы ў рамках ініцыятывы «Адзін пояс і адзін шлях».
Сярод гасцей мерапрыемства быў пасол Украіны ў КНР Алег Дзёмін. Выступаючы з прамовай, ён адзначыў, што быў рады бачыць многіх кітайскіх сяброў ля ўкраінскага стэнда, бо гэта сведчыць пра цікавасць да Украіны з боку кітайскіх і міжнародных кінематаграфістаў і пра вялікія перспектывы двухбаковага супрацоўніцтва паміж краінамі.
«Украіна можа прапанаваць кітайскім партнёрам выдатныя ўмовы кіналакацыі, каманды спецыялістаў, акцёраў і сучасны кантэнт. Апроч таго, у бліжэйшы час будзе падпісана міжурадавае пагадненне аб сумеснай кінавытворчасці, і я спадзяюся, што гэта стане выдатнай юрыдычнай асновай для нашага супрацоўніцтва», -- рэзюмаваў Алег Дзёмін.
Выканаўчы дырэктар Азіяцкага рэгіёна Украінскай кінаасацыяцыі Алена Шаўчэнка паведаміла карэспандэнту МРК, што Украіну вельмі цікавіць кітайскі кінарынак, таму ўкраінскі бок старанна падрыхтаваўся да ўдзелу ў Пекінскім міжнародным кінафестывалі. Гэта мерапрыемства стала першай прэзентацыяй украінскай кінаіндустрыі ў гісторыі фестывалю, таксама на кінарынку Пекінскага кінафестывалю адкрыты стэнд Украіны. - Р -