Пяць палітычных партый праходзяць у Вярхоўную Раду Украіны 9-га склікання па выніках праведзеных у нядзелю датэрміновых парламенцкіх выбараў. Пра гэта паведаміла агенцтва Укрінфарм, спасылаючыся на канчатковыя вынікі Нацыянальнага экзітпола.

　　Лідарам электаральных пераваг стала прапрэзідэнцкая партыя "Слуга народа". У агульнадзяржаўнай шматмандатнай акрузе яе падтрымалі 44,2 працэнта ўкраінцаў.

　　У фарміраванні новага парламента таксама возьмуць удзел "Апазіцыйная платформа - За жыццё" ( 11,4%) , "Еўрапейская салідарнасць" экс-прэзідэнта Пятра Парашэнкі (8,8%), "Бацькаўшчына" Юліі Цімашэнка (7,4 працэнта) і "Голас" вядомага рок-музыканта Святаслава Вакарчука ( 6,5 прац.).

　　Астатнія 17 партый, якія змагаліся за дэпутацкія мандаты ў агульнадзяржаўнай акрузе, не змаглі пераадолець 5-працэнтны бар'ер.

　　Нацыянальны экзітпол быў праведзены Фондам "Дэмакратычныя ініцыятывы" ім. Ілька Кучэрыва, Кіеўскім міжнародным інстытутам сацыялогіі і Украінскім цэнтрам эканамічных і палітычных даследаванняў імя Аляксандра Разумкова.

　　Нагадаем, цяпер ва Украіне дзейнічае змяшаная сістэма галасавання на выбарах у Вярхоўную Раду: адна палова з 450 парламентарыяў абіраецца па прапарцыйнай сістэме ў агульнадзяржаўнай шматмандатнай акрузе, іншая - па мажарытарнай сістэме ў аднамандатных акругах. Для траплення ў Вярхоўную Раду па прапарцыйнай сістэме партыям трэба пераадолець 5-працэнтны бар'ер, а кандыдатам-мажарытаршчыкам дастаткова атрымаць адносную большасць галасоў.