Дзейнасць Апеляцыйнага органа СГА будзе афіцыйна заблакаваная з 11 снежня, што, несумненна, парушыць працу механізму арганізацыі па ўрэгуляванні спрэчак, але гэта не азначае, што механізм, заснаваны на правілах, канчаткова страціць сілу. Пра гэта ў аўторак заявіў генеральны дырэктар СГА Раберту Азеведу. Выступаючы на прэс-канферэнцыі пасля двухдзённага пасяджэння Генеральнага савета СГА, Р. Азеведу абвясціў, што з 11 снежня Апеляцыйны орган больш не зможа прымаць да разгляду новыя рашэнні па спрэчках. Паводле яго слоў, гэта, несумненна, нашкодзіць механізму ўрэгулявання спрэчак СГА і паставіць "нявырашаныя" гандлёвыя спрэчкі ў "няпэўнае" становішча.
Аднак гендырэктар арганізацыі лічыць, што блакаванне Апеляцыйнага органа не прывядзе да спынення працы механізму СГА па ўрэгуляванні спрэчак на аснове правілаў. Члены СГА змогуць не толькі працягваць вырашаць гандлёвыя спрэчкі з дапамогай кансультацый і дакладаў груп экспертаў, але і ўрэгуляваць пытанні, звязаныя з пераглядам спрэчак, іншымі спосабамі, такімі як арбітраж.
Апеляцыйны орган з'яўляецца важнай часткай механізму СГА па ўрэгуляванні спрэчак. Будучы фактычна "Вярхоўным судом" у сферы міжнароднага гандлю, Апеляцыйны орган мае права на перагляд першапачатковых арбітражных дакладаў, апублікаваных групамі экспертаў СГА. Пры гэтым яго пастанова разглядаецца як "канчатковае судовае рашэнне", якое мае абавязковую сілу.