Другая вялікая эпідэмія: ЗША захліснула хваля «агнястрэлаў»

У ЗША ў 2020 годзе пастаўлены сумны рэкорд смяротнасці ад гвалтоўных злачынстваў з ужываннем агнястрэльнай зброі.

Ад агнястрэльных раненняў загінулі 19 тыс. 302 чалавека - гэта максімальны паказчык за два з лішнім дзесяцігоддзі. Рост узброеных нападаў СМІ назвалі «другой вялікай эпідэміяй», якая грымнула адначасова з бурным распаўсюджваннем COVID-19. Ад злачынстваў з ужываннем агнястрэльнай зброі пакутуюць нават нявінныя дзеці. Сярод ахвяр «агнястрэлаў» у 2020 годзе ў ЗША - 160 дзяцей і падлеткаў ва ўзросце ад некалькіх месяцаў да 17 гадоў. 13 ліпеня 2020 года краіна была шакіраваная смерцю гадавалага Давела Гарднера ў Нью-Ёрку: куля трапіла яму ў жывот у адным з паркаў Брукліна.

Назіральнікі асцерагаюцца, што сумная тэндэнцыя да росту ўзброенага гвалту можа захавацца ў ЗША і ў 2021 годзе. «Эпідэмія COVID-19 агаліла такія старыя праблемы ЗША, як крызіс сістэмы аховы здароўя, расавая дыскрымінацыя і растучы разрыў паміж багатымі і беднымі. Гэта прывяло да абвастрэння і без таго балючай праблемы ўзброенага гвалту ў ЗША, і надзеі на паляпшэнне сітуацыі ў бліжэйшай будучыні няма», - кажа намеснік дырэктара інстытута Амерыкі пры Акадэміі грамадскіх навук КНР Юань Чжэн.

На думку назіральнікаў, каталізатарам росту злачынстваў з ужываннем агнястрэльнай зброі сталі такія фактары, як стрэс і беспрацоўе на фоне эпідэміі COVID-19 у ЗША, якія лідзіруюць па колькасці заражэнняў каронавірусам новага тыпу. Паводле даных праведзенага ў снежні агульнаамерыканскага сацапытання, каля 34% дарослага насельніцтва ЗША - 83 млн чалавек - з-за складанай эканамічнай сітуацыі ледзь зводзяць канцы з канцамі. Больш за 12 млн чалавек прызналі, што ўжо пратэрмінавалі аплату арэнды. Эканамічны крызіс вядзе да росту злачыннасці. У 21 амерыканскім горадзе, якія прадастаўляюць адкрытую статыстыку па крымінальнай сітуацыі, летам-восенню мінулага года было здзейснена на 610 больш забойстваў, чым у той жа перыяд годам раней. Улетку колькасць злачынстваў з ужываннем агнястрэльнай зброі вырасла на 15% у гадавым вылічэнні, восенню - на 16%. «Беспрацоўе, якое расце, і няўпэўненасць у будучыні, велізарная колькасць смерцяў ад COVID-19 пазбавілі амерыканцаў пачуцця бяспекі, што пацягнула хвалю ўзброенага гвалту на фоне эпідэміі», - рэзюмуе прафесар інстытута сучасных міжнародных адносін Сунь Чэнхаа.