Кітайскі тэлескоп FAST афіцыйна адкрыты для навукоўцаў усяго свету

Пачынаючы з 31 сакавіка, кітайскі радыётэлескоп FAST / Five hundred meter Aperture Spherical Telescopе / - найбуйнейшы ў свеце аднаапертурны радыётэлескоп і самы адчувальны радыётэлескоп, афіцыйна адкрыты для навуковых колаў усяго свету.

Эксперты мяркуюць, што гіганцкі тэлескоп будзе спрыяць глабальным астранамічным даследаванням і дапамагаць знайсці адказы на некаторыя з самых галоўных пытанняў адносна нязведанага ў сучаснай астрафізіцы і касмалогіі.

З 31 сакавіка па 15 мая гэтага года астраномы па ўсім свеце могуць падаць заяўкі на назіранне і вынікі ацэнкі іх праектаў будуць абвешчаныя 20 ліпеня, гаворыцца ў заяве Дзяржаўнай астранамічнай абсерваторыі пры Акадэміі навук Кітая / АНК /. Назіранні замежных навукоўцаў пачнуцца ў жніўні бягучага года.

Чакаецца, што замежным навукоўцам будзе выдзелена каля 10 працэнтаў часу назірання з дапамогай FAST за першы год, а гэта прыкладна 450 гадзін, сказаў Лі Дзі, галоўны навуковы супрацоўнік праекта FAST і даследчык Дзяржаўнай астранамічнай абсерваторыі.

У Сянпін, акадэмік АНК і дырэктар навуковага камітэта FAST, сказаў, што заяўкі, пададзеныя кітайскімі і замежнымі навукоўцамі, будуць ацэньвацца вядучымі міжнароднымі экспертамі ў адпаведных галінах для забеспячэння таго, каб ухваленыя заяўкі адпавядалі перадавым галінам даследавання.

Канкурэнцыя за час для назіранняў сярод кітайскіх навукоўцаў ужо была вельмі інтэнсіўнай. Падчас выпрабавальнага запуску адкрытых назіранняў у 2019 годзе планавалася, што FAST будзе адкрыты на працягу 360 гадзін, але ў выніку ў заяўках было запытана больш за 2000 гадзін назіранняў. У 2020 годзе было ўхвалена толькі каля 30 працэнтаў ад усіх заявак.

У 1994 годзе пачаліся папярэднія даследаванні па праекце FAST і яго будаўніцтва было завершана ў верасні 2016 года. У студзені 2020 года ён быў афіцыйна здадзены ў эксплуатацыю пасля функцыянавання ў тэставым рэжыме на працягу больш чым трох гадоў. З тых часоў тэлескоп прадастаўляе паслугі ў стабільным і надзейным рэжыме.