Правядзенне CIFTIS — сімвалічны крок Кітая

Правядзенне Кітайскага міжнароднага кірмашу гандлю паслугамі-2021 /CIFTIS/ у перыяд, калі свет сутыкнуўся з беспрэцэдэнтным выпрабаваннем для рынку паслуг, з'яўляецца вельмі важным і сімвалічным крокам Кітая. Пра гэта заявіў прэзідэнт Беларусі Аляксандр Лукашэнка на Саміце па глабальным гандлі паслугамі, які прайшоў у анлайн-фармаце ў рамках CIFTIS.

Выступаючы са зваротам да ўдзельнікаў саміту, ён адзначыў, што за гады трывалай дружбы Беларусь неаднаразова пераконвалася ў паслядоўнасці палітыкі Кітая, які аб'яднаў мноства краін у рамках ініцыятывы "Пояс і шлях" на ўмовах справядлівага, раўнапраўнага і ўзаемавыгаднага супрацоўніцтва. Больш за тое, перажытыя ўзрушэнні, абумоўленыя пандэміяй COVID-19 і іншымі глабальнымі выклікамі, толькі ўмацавалі яго, падкрэсліў ён.

"Правядзенне выставы ў гэтак няпросты час — важны і сімвалічны крок, бо закрыццё межаў, зніжэнне турыстычнай актыўнасці, разрыў лагістычных ланцужкоў, рост пратэкцыянізму, каласальны націск на сістэму аховы здароўя і адмена міжнародных культурных мерапрыемстваў сталі беспрэцэдэнтным выпрабаваннем для рынку паслуг", — сказаў А. Лукашэнка. Паводле яго слоў, эпідэмія стымулявала бум лічбавых тэхналогій, паслужыўшы імпульсам для якаснай перазагрузкі традыцыйнай сферы паслуг. У гэтым кантэксце перадавы вопыт Кітая па развіцці і ўкараненні паслуг дыстанцыйнай адукацыі, анлайн-дыягностыкі і лячэння, прымяненні лічбавых тэхналогій у галіне турызму асабліва ўражвае.

Кажучы аб неабходнасці нарошчвання экспарту і імпарту паслуг, Лукашэнка выказаў спадзяванне на пашырэнне супрацоўніцтва з Кітаем у гэтай сферы, як з адным з ключавых партнёраў Беларусі. "У якасці прыярытэтнага напрамку мы бачым сумесную працу дзяржаў па далейшай лібералізацыі гандлю паслугамі, ліквідацыі бар'ераў, прыцягненні інвестыцый", — растлумачыў ён.

Кіраўнік Беларусі падкрэсліў важнасць трансгранічнай электроннай камерцыі, якая стала эфектыўным рэсурсам для аднаўлення эканамічнага росту. "Беларусь бачыць вялікія перспектывы ў выхадзе на кітайскія анлайн-пляцоўкі для прасоўвання не толькі тавараў, але і паслуг у сферах адукацыі, турызму, медыцыны", — адзначыў ён.

Асаблівую ўвагу А. Лукашэнка надаў чыгуначнаму маршруту Кітай-Еўропа, адзначыўшы, што з 2014 па 2020 год аб'ёмы чыгуначных кантэйнерных перавозак праз Беларусь павялічыліся ў 14 разоў. "Рэспубліка Беларусь і далей будзе прымаць усе неабходныя меры для забеспячэння бесперабойнага руху цягнікоў на чыгунцы па гэтым маршруце", — запэўніў ён.