У Цэнтральным Кітаі завяршыліся міжнародныя міратворчыя вучэнні "Агульны лёс-2021"

Міжнародныя міратворчыя вучэнні "Агульны лёс-2021", арганізаваныя кітайскімі ўзброенымі сіламі, завяршыліся 15 верасня на трэніровачным палігоне сухапутных войскаў Народна-вызваленчай арміі Кітая, размешчаным у павеце Цюешань (прав. Хэнань, Цэнтральны Кітай).

Член Цэнтральнага ваеннага савета / ЦВС / Лі Цзачэн, які з'яўляецца таксама начальнікам Аб'яднанага штаба ЦВС, назіраў за комплекснымі вучэннямі, прысутнічаў на цырымоніі закрыцця і абвясціў аб іх завяршэнні.

У комплексных вучэннях, якія пачаліся каля 9 гадзін раніцы, прынялі ўдзел больш за 1 000 афіцэраў і салдат з такіх краін, як Кітай, Манголія, Пакістан і Тайланд.

Пад аб'яднаным камандаваннем яны выконвалі такія задачы, як будаўніцтва часовых аперацыйных баз, патруляванне, узброеная ахова, абарона мірных жыхароў, а таксама рэагаванне на акты гвалту і тэракты.

Шматнацыянальныя манеўры, якія стартавалі 6 верасня, з'яўляюцца важным спадарожным мерапрыемствам, прымеркаваным да 50-й гадавіны аднаўлення законнага месца Кітайскай Народнай Рэспублікі ў Арганізацыі Аб'яднаных Нацый.

Падчас вучэнняў вайскоўцы розных краін правялі сумесную ваенную падрыхтоўку, цесна супрацоўнічалі і вучыліся адзін у аднаго.

Гэтыя вучэнні дапамаглі ацаніць і ўмацаваць гатоўнасць рэзервовых сіл да выканання міратворчых задач. Яны таксама спрыялі ўмацаванню абменаў, узаемнага даверу і прагматычнага супрацоўніцтва паміж удзельнікамі мерапрыемства.