Кітай перадаў міратворцам ААН вакцыны ад COVID-19

Цырымонія перадачы вакцын ад COVID-19, ахвяраваных урадам КНР міратворцам ААН, адбылася 17 верасня па відэасувязі.

Міратворчыя аперацыі ААН з'яўляюцца важным сродкам падтрымання міру і бяспекі ва ўсім свеце, заявіў намеснік кіраўніка Агенцтва па супрацоўніцтве ў галіне міжнароднага развіцця Чжан Мааюй. Эпідэмія каронавіруса стварыла новыя праблемы для бяспекі міратворцаў ААН. Каб забяспечыць іх здароўе і бяспеку, а таксама дапамагчы ім лепш выконваць свае абавязкі, Кітай перадае міратворцам вакцыны з прыярытэтам на раёны місій у Афрыцы, паведаміў ён.

Гэта ў поўнай меры адлюстроўвае падтрымку Кітая ў дачыненні да ААН і мультылатэралізму, а таксама клопат пра міратворцаў, адзначыў намеснік кіраўніка агенцтва. Кітай працягне паглыбляць міжнароднае супрацоўніцтва ў барацьбе з эпідэміяй, дапамагаць у стабілізацыі і аднаўленні сусветнай эканомікі, а таксама садзейнічаць пабудове супольнасці адзінага лёсу чалавецтва, падкрэсліў Чжан Мааюй.

Ад імя генеральнага сакратара ААН Антоніу Гутэрыша і сістэмы ААН памочнік генеральнага сакратара Крысціян Сандэрс выказаў шчырую ўдзячнасць ураду Кітая за шчодрую дапамогу. Выступаючы па відэасувязі, ён заявіў, што вакцыны, перададзеныя Кітаем, вельмі неабходныя і своечасовыя. Яны эфектыўна ўмацуюць магчымасці сістэмы ААН супрацьстаяць эпідэміі, а таксама будуць мець надзвычай важнае значэнне для дапамогі міратворцам у паспяховым выкананні іх абавязкаў і місій.