Прыбытак кітайскіх вытворцаў крэмнія вырас пасля ўвядзення гандлёвых забарон ЗША

Крэмній і полікрэмній - ключавыя матэрыялы для сусветнай індустрыі сонечных панэляў. Сёлета рост коштаў забяспечыў кітайскім вытворцам крэмнія рэкордны прыбытак. І гэта нягледзячы на шэраг санкцыяў з боку ЗША, якія абвінавацілі кампаніі з Сіньцзяна ў выкарыстанні прымусовай працы.

Сіньцзян Daqo New Energy - вядучы вытворца полікрэмнію для сусветнай фотаэлектрычнай прамысловасці. У трэцім квартале 2021 года кампанія зрабіла справаздачу аб рэкордных аб'ёмах вытворчасці і атрыманага чыстага прыбытку. Гэта адна з пяці кампаній, супраць якіх у чэрвені Міністэрства гандлю ЗША ўвяло санкцыі па абвінавачанні ў выкарыстанні прымусовай працы уйгураў. У "Daqo New Energy" рашуча адмовілі падобныя падазрэнні.

Начальнік аддзела кадраў кампаніі Daqo New Energy Гэн Вэйвэй кажа: “Да ліпеня сярэднемесячны даход сярод супрацоўнікаў кампаніі складаў каля 1200 долараў. Сярэдні заробак для работнікаў з ліку меншасцяў склаў 1900 долараў. У штаце адносна мала супрацоўнікаў з ліку меншасцяў, многія з іх займаюць пасады сярэдняга ўзроўню, і, як правіла, зарабляюць больш".

Намеснік дырэктара аддзела тэхабслугоўвання абсталявання кампаніі Daqo New Energy Юй Чжэнхай: "Пасля выхаду на біржу сёлета кампанія аб'явіла аб выпуску акцыі для менеджэраў сярэдняга звяна, для павышэння лаяльнасці супрацоўнікаў. За 10 гадоў я прайшоў шлях ад рабочага да намесніка дырэктара цэха па рамонце абсталявання. Здольным інжынерам кампанія прадастаўляе масу магчымасцяў для прасоўвання па службе".

Адным з эфектаў ад санкцый ЗША стала развіццё тэхналогій вытворчасці. Кампаніі з амерыканскага "чорнага спісу" асвоілі працэс вырабу полікрэмнію для электронікі. Гэты матэрыял патрабуе значна больш высокага ўзроўню ачысткі, чым фотаэлектрычны, і можа выкарыстоўвацца ў паўправадніках.

Намеснік генеральнага дырэктара кампаніі Daqo New Energy Тань Чжунфан: “У нас ёсць праект па вытворчасці 1000 тон полікрэмнію для электронікі. Мы завяршылі набор персаналу і тэхнічную падрыхтоўку і зараз выбіраем пляцоўку. Калі ўсё будзе добра, то праз два гады мы будзем вырабляць полікрэмній для электронікі".

Цяпер Кітай забяспечвае больш за 70% сусветнага рынку полікрэмнію. У спісе кліентаў "Daqo New Energy" кліенты з ЗША складаюць толькі малую частку, а сыравіна для вытворчасці закупляецца, у асноўным, на ўнутраным рынку Кітая. Ва ўмовах росту попыту і прапановы санкцыі ЗША не аказалі значнага ўплыву на працу кітайскіх вытворцаў. Але ёсць патэнцыйныя рызыкі.

Намеснік генеральнага дырэктара кампаніі Hoshine Silicon Industry Чжу Чжыцян: "Металічны крэмній выкарыстоўваецца ў многіх галінах прамысловасці. Калі будуць жорсткія меры ў дачыненні да прадукцыі, што вырабляецца на экспарт, негатыўны эфект ад санкцый будзе выражаны мацней".

Таксама вытворцы крэмнію бачаць у санкцыях ЗША доўгатэрміновую пагрозу сусветнаму ланцужку паставак і чарговую спробу стрымаць тэхналагічнае развіццё Кітая.

Тэхнічны дырэктар кампаніі New Energy Materials Шэнь Фэн: "Калі мы адпрацуем нашу тэхналогію вытворчасці полікрэмнію на сучасным абсталяванні і механізмы кантролю якасці, будзе прасцей перайсці да вытворчасці крэмнію для электронікі. Заходнія краіны баяцца канкурэнцыі з боку кітайскіх тэхналогій вытворчасці чыпаў і літаграфіі і не хочуць ставіцца да нас, як да роўных пастаўшчыкоў".

Вытворцы крэмнію ў Сіньцзяне ўпэўненыя: лепшы адказ на гандлёвыя забароны - павышэнне канкурэнтаздольнасці. А паколькі Кітай імкнецца да вугляроднай нейтральнасці, унутраны рынак аднаўляльнай энергетыкі спаўна здольны кампенсаваць страты ад міжнародных санкцый.