Кітайская асацыяцыя аўтавытворцаў прагназуе падваенне продажаў электракараў і гібрыдаў па выніках года

Больш за тры мільёны электракараў і гібрыдаў прададуць у Кітаі па выніках года. Такі прагноз зрабіла Кітайская асацыяцыя аўтавытворцаў, ацаніўшы тэмпы росту кастрычніцкіх продажаў. Кітайскі рынак аўтамабіляў на новай энергіі вырас у два разы ў параўнанні з годам раней і складае палову агульнасусветнага. На шэньчжэньскім заводзе лідара кітайскага электрамабілебудавання мы даведаліся пра прычыны буму і фактары яго стрымлівання.

BYD паказвае прагрэс. У кастрычніку шэньчжэньскі аўтавытворца прадаў 80 тысяч пасажырскіх аўтамабіляў на новай энергіі: утрая больш, чым месяцам раней. Доля чыстых электрамабіляў у продажах расце, але гібрыды ўсё яшчэ прадаюцца лепш.

Дырэктар дэпартамента брэндынгу і сувязяў з грамадскасцю аўтаканцэрна BYD Браян Ло кажа: "Мы выйгралі ад выбухнога росту ўсяго рынку. У верасні ў Кітаі прадалі 334 тысячы электракараў, гэта пятая частка ўсіх аўтапродажаў. Нашы продажы забяспечаны вядучымі ў свеце тэхналогіямі, такімі як батарэі "Блэйд" і супергібрыдная сістэма DM-i. Наш запас ходу на адной запраўцы павялічыўся да 1200 кіламетраў".

Фірмовы акумулятар BYD адрозніваецца павышанай трываласцю і пажарабяспекай, а высокі запас ходу забяспечаны працай супергібрыднай сістэмы, у якой рухавік унутранага згарання зараджае батарэю. Продажы электракараў стымулююць не толькі новыя тэхналогіі, але і дзяржрэгуляванне, якое абмяжоўвае куплю бензінавых машын у мегаполісах.

Дацэнт Кітайскага ўніверсітэта Сянгана ў Шэньчжэне У Хайфэн адзначае: “Рэгуляванне, якое мяняе спажыванне. Я атрымаў субсідыю на куплю гэтага электракара. Мне не трэба было чакаць паўгода для атрымання сіняга рэгістрацыйнага нумара для бензінавай машыны. З пункту гледжання затрат на кіламетр шляху ён нашмат танней, і, нарэшце, за рулём электракара я пачуваюся лепш, паколькі ўношу ўклад у дасягненне вугляроднай нейтральнасці”.

Тэмпы росту продажаў чыстых электракараў стрымлівае недахоп зарадных станцый. Іх у Кітаі ўжо больш за два мільёны, у сярэднім атрымліваецца па адной на тры электрамабілі, але размеркаваны яны нераўнамерна. Па падліках экспертаў у публічных месцах колькасць зарадак неабходна падвоіць. Але акрамя гэтага яны павінны з'явіцца па-за межамі мегаполісаў і гарадскіх цэнтраў. Цяпер іх усталёўваюць там, дзе вяртанне інвестыцый вышэй.

Дацэнт Кітайскага ўніверсітэта Сянгана ў Шэньчжэне У Хайфэн дадае: “Гэта ўносіць дысбаланс у продажы так, што ў гарадах усё больш машын, але ніхто не купляе іх у сельскіх раёнах. Варта памятаць пра тое, што ў Кітаі каля паловы насельніцтва прыпадае на сельскія раёны, 70 % жывуць за межамі мегаполісаў. Пытанне ў тым, як стымуляваць інвестараў укладвацца ў будаўніцтва зараднай інфраструктуры ў раёнах яе слабога выкарыстання".

Яшчэ адным фактарам абмежавання росту продажаў электракараў могуць стаць батарэі. Эксперты прагназуюць востры дэфіцыт літыя з наступнага года. Апроч гэтага таксічны хімікат патрабуе складанай утылізацыі пасля выпрацоўкі батарэйнага рэсурсу. BYD ужо сфарміравала адмысловую даследчую групу для вырашэння праблемы. Кампанія плануе прадставіць яго да таго моманту, калі электракары стануць масавай з'явай на дарогах.