Валютныя рэзервы Кітая ў траўні выраслі да 3,2218 трлн дол. ЗША

Па стане на канец мая 2021 года валютныя рэзервы Кітая выраслі да 3,2218 трлн дол. ЗША, павялічыўшыся на 23,6 млрд долараў у месячным выражэнні, сведчаць афіцыйныя даныя, апублікаваныя ў панядзелак.

"У траўні гэтага года рынак замежнай валюты падтрымліваў тэндэнцыю стабільнага функцыянавання, пры гэтым гандаль на ім у цэлым ажыццяўляўся ў рацыянальным і спарадкаваным рэжыме", - адзначыла намеснік кіраўніка Дзяржаўнага ўпраўлення валютнага кантролю КНР Ван Чуньін.

Яна патлумачыла рост валютных рэзерваў краіны ўмацаваннем асноўных нядоларавых валют і ўкараненнем вакцын супраць COVID-19, што прывяло да росту кошту нядоларавых актываў Кітая.

Нягледзячы на тое, што ў сітуацыі з сусветнай эканомікай і фінансамі ўсё яшчэ захоўваецца нявызначанасць, эканоміка Кітая стабільна аднаўляецца, што дапаможа захаваць стабільнасць валютных рэзерваў, дадала Ван Чуньін.