Генеральным дырэктарам СГА ўпершыню стане жанчына

Старшыня Генеральнага савета Сусветнай гандлёвай арганізацыі Дэвід Уокер 8 кастрычніка заявіў, што па выніках двух раўндаў кансультацый краіны-члены прыйшлі да высновы, што новым генеральным дырэктарам арганізацыі стане жанчына. Гэта азначае, што жанчына ўзначаліць СГА ўпершыню за 25 гадоў з моманту заснавання гэтай арганізацыі.

Па словах Д. Уокера, пасля другога раўнда кансультацый удзел у гонцы за пасаду генеральнага дырэктара працягваюць кандыдат ад Нігерыі Нгозі Аконджа-Івеала і кандыдат ад Рэспублікі Карэя Ю Мен Хі. Трэці раўнд адбору кандыдатаў на пасаду генеральнага дырэктара пройдзе з 19 па 27 кастрычніка.

Н. Аконджа-Івеала раней займала пасады міністра фінансаў і міністра замежных спраў Нігерыі. У цяперашні час яна займае пасаду старшыні савета дырэктараў Глабальнага альянсу па вакцынах і імунізацыі.

У сваю чаргу, стаж працы Ю Мен Хі ў галіне гандлю складае 25 гадоў. Яна шматкроць прадстаўляла паўднёвакарэйскі бок на буйных міжнародных перамовах. Так, яна з'яўляецца важным прадстаўніком паўднёвакарэйскага боку на перамовах па пытанні заключэння Пагаднення аб Рэгіянальным усеабдымным эканамічным партнёрстве, пагаднення аб зоне свабоднага гандлю паміж Кітаем і Рэспублікай Карэя, а таксама новага пагаднення аб ЗСГ паміж Рэспублікай Карэя і ЗША.

Шосты па ліку генеральны дырэктар СГА Раберту Азэведа пакінуў свой пост 31 жніўня -- на год раней за гэты тэрмін. Працэдура выбару новага генеральнага дырэктара пачалася 8 чэрвеня, і ў спіс кандыдатаў афіцыйна ўвайшлі восем чалавек. У ходзе кансультацый кола кандыдатаў паступова звузілася. Выніковая кандыдатура на пасаду генеральнага дырэктара будзе вылучана ў адпаведнасці з прынцыпам аднагалоснасці. --0--