Кітайская моладзь усё часцей аддае перавагу наведванню музеяў іншым забавам
Кітайская моладзь праяўляе ўсё больш цікавасці да культурнай спадчыны краіны. Гэтаму спрыяе павелічэнне колькасці музеяў - як традыцыйных, так і анлайн. У правінцыі Хэнань адкрылася выстава ўнікальных вырабаў ручной працы, знойдзеных у дэльце ракі Хуанхэ. Экспанаты дэманструюць бездакорную тэхніку старажытных майстроў і служаць сведчаннем актыўных абменаў ідэямі паміж Усходам і Захадам сотні гадоў таму.
Бронзавая галава, пакрытая залатой фальгой. Міфічны звер, залатыя званочкі. Тры сотні рэдкіх экспанатаў з золата і нефрыту ў цяперашні час выстаўлены ў Хэнаньскім музеі ў горадзе Чжэнчжоу ў цэнтральным Кітаі. Інкруставаны золатам жалезны цмок дынастыі Тан сваёй экзатычнай для кітайскіх традыцый знешнасцю расказвае пра эпоху культурных і гандлёвых абменаў.
Экскурсавод Хэнаньскага музея Лі Сяаюй адзначыла: "Культурныя рэліквіі будуць выстаўлены на ўсеагульны агляд да 20 лютага. Падчас навагодніх канікул для дзяцей ва ўзросце ад 6 да 12 гадоў працуе спецыяльны гід. Музей запрашае ўсіх наведвальнікаў ацаніць прыгажосць золата і нефрыту".
Сярод наведвальнікаў шмат моладзі. Музей праводзіць прамыя трансляцыі ў сацсетках і такім чынам пашырае аўдыторыю. Тым больш, што разбірацца ў традыцыйным культурным кодзе сёння модна.
Наведвальнік Хэнаньскага музея Лю Шухаа сказаў:"«Хуткая мода» не адпавядае майму густу. Я аддаю перавагу глыбіннаму культурнаму кантэксту, які магу знайсці ў музеях".
"У параўнанні з іншымі відамі забаў, наведванне музея больш экалагічнае і таннае. Тут я магу атрымаць шмат ведаў і лепш зразумець культуру", - выказаўся наведвальнік Хэнаньскага музея Лю Чжэньдун.
На выставе прадстаўлены экспанаты з 23 музеяў 9-ці правінцый уздоўж ракі Хуанхэ. Экспазіцыя ахоплівае часавы прамежак амаль у 4000 гадоў і дае магчымасць прасачыць развіццё майстэрства і ўяўленняў пра свет старажытнай кітайскай цывілізацыі.