Пекін аднаўляе цэнтральны гістарычны раён у надзеі на ўключэнне яго ў спіс ЮНЕСКА

У Пекіне аднаўляюць гістарычны раён, вядомы як Цэнтральная вось. Рэстаўрацыя гістарычнага цэнтра кітайскай сталіцы заклікана захаваць помнікі архітэктуры і палепшыць гарадское асяроддзе, а таксама садзейнічаць уключэнню яго ў спіс Сусветнай культурнай спадчыны ЮНЕСКА.

Пекін -- горад сіметрыі. Яго Цэнтральная вось -- умоўная 8-кіламетровая лінія гістарычнай забудовы, якая злучае браму Юндзінмэнь на поўдні і Калькольную і Барабанную вежы на поўначы. Гэта раён архітэктурных помнікаў і культурных рэліквій. Сярод іх Забаронены горад -- аб'ект Сусветнай спадчыны ЮНЕСКА з 1987-га года. У 2013 годзе Пекін падаў заяўку на ўключэнне ў спіс шырокай тэрыторыі вакол былога імператарскага палаца.

Кіраўнік Пекінскага муніцыпальнага бюро культурнай спадчыны Чэнь Міньцзэ сказаў: "Мы правялі шэраг дэталёвых даследаванняў у гэтым раёне і склалі план рэканструкцыі сістэм водазабеспячэння, грамадскіх паркаў і алей. У выніку распрацаваныя эфектыўныя стратэгіі і кіруючыя прынцыпы".

Згодна з гэтымі прынцыпамі захаванне і абарона гістарычных будынкаў важныя не менш, чым мадэрнізацыя гарадской інфраструктуры. Дырэктар камітэта па гарадской гаспадарцы пекінскага раёна Січэн Лю Вэйянь адзначыў: "Мы праводзім аднаўленчыя работы не толькі ўздоўж восі, але і па ўсім раёне. На гэты момант мы выканалі больш за палову работ у Січэне. Бягучыя меры ўключаюць перасяленне жыхароў, знос незаконных пабудоў і азеляненне . Наша мэта -- паважаць меркаванне жыхароў, пры гэтым актыўна залучаючы іх у працах па рэканструкцыі і ахове".

Трохгадовы план дзеянняў уключае 48 праектаў па захаванні помнікаў. У гістарычных раёнах Гулоу і Шычахай ужо ідзе рэстаўрацыя грамадскай прасторы і мясцовых адметных мясцін.

"Цэнтральная вось Пекіна -- сведка гісторыі. Прастора адлюстроўвае традыцыйную кітайскую эстэтыку, якая аддае перавагу сіметрыі і прытрымліванню культурных нормаў. Улады Пекіна разлічваюць, што рэстаўрацыя гістарычнага цэнтра кітайскай сталіцы прывядзе яго ў адпаведнасць з патрабаваннямі камісіі па ўключэнні ў спіс помнікаў Сусветнай культурнай спадчыны ЮНЕСКА. У любым выпадку рэканструкцыя Цэнтральнай восі Пекіна палепшыць гарадское асяроддзе для мільёнаў жыхароў і прывабіць у гэты раён турыстаў.