Мінфін анансаваў новыя фіскальныя меры для стабілізацыі паказчыкаў росту

Скарачэнне падаткаў і збораў, павелічэнне расходаў дзяржбюджэту і дадатковы выпуск аблігацый -- гэта частка комплексу мер, анансаванага ўладамі Кітая для стабілізацыі эканомікі і ўзроўню жыцця. Намеснік міністра фінансаў КНР Сюй Хунцай заявіў, што з пачатку года Кітай увёў больш за 20 стымулюючых падатковых мер для падтрымкі вытворчага сектара, а таксама малога і сярэдняга бізнесу. Акрамя таго, краіна павялічыла бюджэтныя расходы на навуку, сельскую гаспадарку, ахову здароўя і адукацыю.

Па стане на сярэдзіну красавіка агульныя выдаткі дзяржказны склалі 7,2 трлн юаняў. Гэта амаль на 8% больш, чым за аналагічны перыяд 2021-га. Сюй Хунцай таксама падкрэсліў важнасць выпуску рэгіянальных аблігацый для падтрымкі будаўніцтва інфраструктуры. З іх дапамогай правінцыі і муніцыпалітэты КНР плануюць прыцягнуць 3,5 трлн юаняў да канца бягучага года: "Скарачэнне падаткаў і збораў -- ключавая мера для захавання стабільных макраэканамічных паказчыкаў. У перыяд з 1 па 28 красавіка быў праведзены падатковы вылік па дзейным ПДВ для мікрапрадпрыемстваў і па пераплачаным ПДВ у іншых галінах на агульную суму ў памеры 625,6 млрд юаняў. У траўні кампенсацыя ПДВ малым і сярэднім прадпрыемствам будзе завершана датэрмінова, пасля чаго будзе паскораны працэс падатковага вяртання буйным прадпрыемствам. Каб гарантаваць людзям сродкі да існавання, даходы і функцыянаванне органаў улады на мясцовым узроўні, Кітай мае намер павялічыць свае трансфертныя плацяжы мясцовым урадам прыкладна да 9,8 трлн юаняў у бягучым годзе, што на 18% больш, чым у 2021-м".