Пашпарты вакцынацыі

Усё больш краін разглядаюць пытанне аб укараненні пашпартоў вакцынацыі, каб як мага хутчэй аднавіць трансгранічны пасажырапаток і перазапусціць эканоміку. Пашпарт вакцынацыі -- гэта сведчанне пра тое, што яго ўладальнік быў прышчэплены ад COVID-19. Лічыцца, што наяўнасць такога сертыфіката палегчыць трансгранічныя паездкі.

21 студзеня Ісландыя стала першай еўрапейскай краінай, якая прыступіла да ўкаранення прышчэпачных пашпартоў. 17 сакавіка Еўракамісія прапанавала стварыць «электронны пропуск». Мэта праекта заключаецца ў забеспячэнні свабоднага перамяшчэння ў межах Еўропы да гэтага лета. «Зялёны электронны пропуск» будзе выдавацца прышчэпленым чатырма відамі вакцын, ухваленых Еўрапейскім агенцтвам лекавых сродкаў. Пры гэтым Еўракамісія падкрэсліла, што краіны ЕС могуць па сваім меркаванні выдаваць сертыфікат людзям, прышчэпленым іншымі вакцынамі.

8 сакавіка Кітай запусціў дадатак «сведчанне пра здароўе для міжнародных падарожжаў». Гэта адзіны сертыфікат, у якім пазначаны вынікі тэстаў на COVID-19 і даныя пра вакцынацыю, да пасведчання будзе прыкладацца QR-код з паролем для прадастаўлення і праверкі сапраўднасці інфармацыі адпаведнымі ведамствамі розных краін. «Пасведчанне аб здароўі для міжнародных падарожжаў» таксама сапраўднае і ў друкаваным выглядзе.

Польшча, Швецыя, Данія, Ізраіль, Італія, Іспанія, і іншыя краіны выказалі падтрымку ўкараненню пашпартоў вакцынацыі. Аднак ёсць і шмат скептыкаў. Так, ініцыятыву ўкаранення пашпартоў вакцынацыі не падтрымалі ў Сусветнай арганізацыі аховы здароўя. Камітэт СААЗ па надзвычайных сітуацыях растлумачыў, што «не да канца ясна значэнне вакцын у зніжэнні распаўсюджвання каранавіруса, нават пасля вакцынацыі павінны выконвацца меры індывідуальнай абароны».

Намеснік дырэктара Інстытута міжнароднай стратэгіі пры Кітайскім інстытуце міжнародных праблем Су Сяахуэй мяркуе, што існуюць некаторыя нявызначанасці ва ўкараненні пашпартоў вакцынацыі. Не да канца зразумела, як ацэньваць эфектыўнасць вакцынацыі: у многіх краінах яшчэ не сфарміраваныя выразныя профільныя стандарты. Узаемнае прызнанне стандартаў бяспекі вакцын паміж рознымі краінамі патрабуе дадатковых перамоў.