У 2020 годзе ў Кітаі павялічылася колькасць кніжных крамаў, нягледзячы на эпідэмію

Фізічныя кніжныя крамы ў Кітаі вытрымалі націск эпідэміі COVID-19 у 2020 годзе. Нягледзячы на тое, што каля 1500 з іх зачыніліся, у краіне за мінулы год з'явілася больш за 4000 новых, сведчаць актуальныя галіновыя даныя.

Паводле справаздачы, апублікаванай у аўторак на Кітайскай канферэнцыі па кнігарнях, у мінулым годзе ў Пекіне адкрылася 639 новых кніжных крамаў, такім чынам, ён заняў першае месца сярод кітайскіх гарадоў па гэтым паказчыку.

Канферэнцыя, сумесна арганізаваная Кітайскай асацыяцыяй выпуску кніг і перыядычных выданняў і Новым выдавецкім інстытутам Bookdao / BNPI /, была прысвечана даследаванню перспектыў развіцця кнігарняў краіны, у тым ліку інавацый у галіне чытацкіх паслуг.

Дзякуючы наяўнасці ў Пекіне вялікай колькасці кніжных крамаў, іх хуткай мадэрнізацыі, па выніках мінулага года горад атрымаў тытул "Сталіца кнігарняў".

На мерапрыемстве таксама былі ўзнагароджаны больш за 30 кніжных крамаў, якія павялічылі свае продажы і запусцілі інавацыйныя паслугі ў 2020 годзе.

Шмат традыцыйных кніжных крамаў у мінулым годзе падвергліся вялізнаму ціску з-за жорсткай канкурэнцыі з боку электроннай камерцыі, выдаткаў на кіраванне і высокай арэнднай платы падчас эпідэміі.

Кіраўнік BNPI Чэн Саньго на канферэнцыі заявіў, што арганізацыя стрымінгавых мерапрыемстваў і запуск бізнесу анлайн апынуліся эфектыўнымі для змякчэння ўздзеяння эпідэміі на продаж.