Кітайскія вагоны метро пачалі выпрабаванні ў Чыкага

Восем вагонаў, сабраныя кітайскай кампаніяй CRRC Sifang America Incorporated у Чыкага, пакінулі станцыю міжнароднага аэрапорта “О'Хара” і накіраваліся ў цэнтр Чыкага. Гэтыя вагоны, што пастаўляюцца Чыкагскаму транзітнаму ўпраўленню /CTA/, афіцыйна пачалі эксплуатацыйныя выпрабаванні ў рамках транспартнай сістэмы Чыкага.

Вагоны серыі 7000 выкарыстоўваюць новую кампаноўку пярэдніх і задніх фар, а таксама новую канфігурацыю сядзенняў, каб максімізаваць прастору і іх камфорт для пасажыраў. Яны маюць і шэраг іншых пераваг: вагоны абсталяваныя святлодыёдным асвятленнем, удасканаленай сістэмай актыўнай падвескі рухомага складу, новымі тэхналогіямі, спрыяльнымі павышэнню бяспекі і надзейнасці паўсядзённай эксплуатацыі; новым сэнсарным кіраваннем з сістэмай абвесткі аператара, магчымасцямі аддаленага доступу для дыягностыкі тэхнічнага абслугоўвання і дадатковымі камерамі бяспекі высокай выразнасці. Іх максімальная хуткасць складае 112 км за гадзіну.

Чыкагскае транзітнае ўпраўленне праводзіць выпрабаванні 10 вагонаў CRRC Sifang America з мінулага лета, эксплуатуючы іх у непрацоўным рэжыме, каб ацаніць іх функцыянальнасць у розных умовах. Як толькі эксплуатацыйныя выпрабаванні паспяхова завершацца, пачнецца масавая вытворчасць і пастаўка вагонаў.

CRRC Sifang America ў 2016 годзе выйграла кантракт на суму 1,3 млрд долараў на пастаўку ў Чыкага 846 вагонаў серыі 7000. Гэтыя вагоны заменяць амаль палову вагонаў чыкагскага метро, якія выкарыстоўваюцца ўжо больш за 30 гадоў.