Кітайскі зонд "Чан'э-5" сабраў 1731 г месяцовых узораў
Кітайскі зонд "Чан'э-5" сабраў на Месяцы каля 1731 грам узораў грунту, паведамілі ў Кітайскім нацыянальным касмічным упраўленні / CNSA /.
На цырымоніі, якая адбылася ў суботу раніцай, кіраўнік CNSA Чжан Кэцзянь перадаў узоры прэзідэнту Акадэміі навук Кітая / АНК / Хоу Цзяньго.
На цырымоніі прысутнічаў член Палітбюро ЦК КПК, віцэ-прэм'ер Дзяржсавета КНР Лю Хэ, які назваў месяцовую місію "Чан'э-5" важнай вяхой у нарошчванні моцы Кітая ў аэракасмічнай сферы.
Лю Хэ таксама заклікаў як мага лепш арганізаваць супрацоўніцтва і каардынацыю ў даследаванні месяцовых узораў, а таксама ўносіць уклад у выглядзе кітайскіх ведаў у паглыбленне навуковага разумення чалавецтвам фарміравання і эвалюцыі Сусвету.
Грунт затым быў перададзены ў лабараторыю месяцовых узораў у Дзяржаўнай астранамічнай абсерваторыі пры АНК.
Нагадаем, што гэта першыя ў краіне ўзоры грунту, сабраныя на пазаземным аб'екце. Вучоныя будуць займацца іх захоўваннем, аналізам і даследаваннем.
CNSA заявіла пра гатоўнасць да распрацоўкі адпаведных мер у дачыненні да месяцовых узораў, сабраных зондам "Чан'э-5", каб каардынаваць і стымуляваць навуковыя даследаванні, заахвочваць удзел большай колькасці айчынных і замежных навукоўцаў, а таксама імкнуцца дасягнуць больш навуковых вынікаў.
Ведамства таксама будзе ажыццяўляць папулярызацыю навуковых ведаў і культурныя абмены, звязаныя з гэтай місіяй.
Місія месяцовага зонда "Чан'э-5" лічыцца адной з самых складаных у гісторыі касманаўтыкі краіны і першай у свеце місіяй па зборы месяцовых узораў за апошнія больш чым 40 гадоў.
Кітайскі зонд "Чан'э-5", што складаецца з арбітальнага, пасадачнага, узлётнага і вяртаемага модуляў, быў запушчаны 24 лістапада. Яго вяртаемы модуль прызямліўся ў аўтаномным раёне Унутраная Манголія / Паўночны Кітай / у чацвер раніцай, даставіўшы на Зямлю ўзоры месяцовага грунту.