У Кітаі падводзяць вынікі 20 гадоў сяброўства ў СГА

У Кітаі падводзяць вынікі 20 гадоў з моманту ўступлення ў Сусветную гандлёвую арганізацыю. Сяброўства ў СГА дазволіла краіне павялічыць прыток замежных інвестыцый, пашырыць экспарт і падтрымаць тэмпы эканамічнага росту. Выйграў ад гэтага не толькі кітайскі бізнес, але і замежныя фундатары.

Зніжэнне тарыфаў, допуск замежных кампаній і абарона правоў інтэлектуальнай уласнасці – з уступлення ў СГА ў снежні 2001 года Кітай прайшоў доўгі шлях да лібералізацыі рынкавых правілаў і гандлёвых практык. Рэформы дазволілі хутка пераканаць замежных інвестараў, што праца ў КНР -- гэта патэнцыял, магчымасці і перспектывы.

Сярод першапраходцаў апынуўся французскі рытэйлер «Дэкатлон». Яго рознічная сетка ў Кітаі зараз налічвае больш за трыста магазінаў ва ўсіх буйных гарадах краіны. Віцэ-прэзідэнт аддзела па рабоце з карпаратыўнымі кліентамі Decathlon China Ван Ціцін сказала: "Пасля ўступлення Кітая ў СГА мы сталі аднымі з першых рытэйлераў, якія стварылі тут цалкам замежныя прадпрыемствы. Спачатку мы займаліся асобнымі напрамкамі бізнесу, напрыклад, закупкамі. З часам змаглі выбудаваць у Кітаі поўны вытворчы ланцужок: праектаванне, вытворчасць, лагістыку і рознічны гандаль. Уступленне ў СГА паскорыла развіццё кітайскага рынку. Калі мы пашыраемся або інвесціруем у КНР, мы заўсёды можам разлічваць на дзяржпадтрымку".

У кампаніі адзначаюць, што пошук новых партнёраў і кліентаў істотна палягчаюць міжнародныя гандлёвыя выставы, якія рэгулярна праводзяць у Гуанчжоу, Іу і Шанхаі. Хутка расце не толькі сфера рытэйла, але і фінансавы сектар. Змякчэнне абмежаванняў на замежны капітал прывяло на кітайскі рынак сотні банкаў, брокерскіх, крэдытных і кіруючых кампаній.

«У той час кітайскі рынак быў зусім новым і нязведаным напрамкам для ўсіх замежных банкаў. Праз 20 гадоў сітуацыя даволі моцна змянілася. Мы, напрыклад, атрымалі ліцэнзію на працу ў КНР. Гэта дазволіла нам больш эфектыўна абслугоўваць як прыватных асоб, так і карпаратыўных кліентаў, -- адзначыла намеснік гендырэктара прадстаўніцтва Standard Chartered у Кітаі Цзінь Лю. -- Першая група кітайскіх кампаній, якія выйшлі на глабальны рынак, працавала ў сферы здабычы прыродных рэсурсаў. Потым да іх падцягнуліся прадпрыемствы са сфер аховы здароўя і фінансаў. Зараз мы бачым, як на міжнародную экспансію вырашаецца ўсё больш кампаній сектара электроннай камерцыі. Усе гэтыя прадпрыемствы былі падтрыманыя замежнымі банкамі. Удзельнічалі ў гэтым і мы. Ім дапамаглі адкрыць замежныя рахункі, застрахаваць рызыкі, звязаныя з валютнымі курсамі, а зусім нядаўна пачалі кансультаваць іх па пашырэнні разлікаў у юанях».

Кітай за апошнія 20 гадоў таксама стаў ключавым гульцом у сусветным ланцужку паставак. За першыя 11 месяцаў бягучага года агульны кошт кітайскага імпарту і экспарту пераваліў за 35 трлн юаняў, а доля КНР у глабальным гандлі павялічылася да 12 працэнтаў.