У. Нораў правёў прэс-канферэнцыю, прымеркаваную да завяршэння працы на пасадзе генсека ШАС

Генеральны сакратар Шанхайскай арганізацыі супрацоўніцтва Уладзімір Нораў завяршае сваю працу на пасадзе. Падводзячы вынікі развіцця арганізацыі за гэты перыяд, У. Нораў адзначыў, што была праведзена вялікая праца, краіны-члены ШАС прадэманстравалі ўменне працаваць згуртавана ў няпростых умовах.

ШАС за перыяд сваёй дзейнасці заслужыла міжнароднае прызнанне як аўтарытэтнае трансрэгіянальнае аб'яднанне. Яна стала дзейснай пляцоўкай для прыняцця сумесных мер па забеспячэнні ўстойлівага развіцця краін, якія ўваходзяць у арганізацыю, адзначыў у сваім развітальным выступленні Уладзімір Нораў: "Дзяржавы-члены праявілі высокі ўзровень салідарнасці і ўзаемавыручкі. Краіны ШАС выйшлі або выйдуць на дапандэмічныя аб'ёмы вытворчасці на працягу 2022 года".

Сукупны ВУП дзяржаў-членаў ШАС фарміруе больш за траціну сусветнага ВУП. Зараз неабходна шырокая каардынацыя макраэканамічнай палітыкі на аснове адкрытасці і ўзаемнасці, і ШАС магла б адыграць у гэтай працы вядучую ролю. "Працягваецца дзейнасць па стыкоўцы нацыянальных стратэгій развіцця і шматбаковых інтэграцыйных ініцыятыў, закліканая сфарміраваць у Еўразіі давер, раўнапраўнае і ўзаемавыгаднае супрацоўніцтва. Размова ідзе аб кітайскай ініцыятыве "Адзін пояс, адзін шлях" і расійскай -- аб стварэнні Вялікага еўразійскага партнёрства з удзелам краін Асацыяцыі дзяржаў Паўднёва-Усходняй Азіі, ЕАЭС і ШАС, а таксама іншых краін і рэгіянальных аб'яднанняў", -- адзначыў Нораў.

У год свайго 20-годдзя ШАС павялічылася да 21 дзяржавы за кошт далучэння да яе Ірана як паўнапраўнай дзяржавы-члена, а таксама Саудаўскай Аравіі, Егіпта і Катара як партнёраў па дыялогу. У. Нораў адзначыў поспехі ШАС у выпрацоўцы агульных рашэнняў і супрацьстаянні такім міжнародным пагрозам, як тэрарызм і экстрэмізм.

У. Нораў выказаў упэўненасць, што добрыя традыцыі, якія сфарміраваліся ў арганізацыі, у будучым захаваюцца і ўмацуюцца.