ВУП Кітая у першым квартале 2022 года вырас на 4,8%
ВУП Кітая ў першым квартале вырас амаль на 5%. Такія звесткі прадставілі ў Дзяржаўным статыстычным упраўленні КНР. У абсалютным выражэнні ВУП склаў 27 трыльёнаў юаняў. Паказчык на 1,3% вышэйшы за апошні квартал мінулага года. Ва ўпраўленні адзначылі, што эканоміка Кітая працягвае дэманстраваць упэўненыя вынікі, нягледзячы на пагаршэнне сітуацыі на міжнароднай арэне і ўспышкі каранавіруса ўнутры краіны.
Афіцыйны прадстаўнік Дзяржаўнага статыстычнага ўпраўлення КНР Фу Лінхуэй: "Эканоміка Кітая працягнула аднаўленне ў першым квартале. На фоне знешніх і ўнутраных выклікаў забеспячэнне эканамічнай стабільнасці застаецца галоўным прыярытэтам уладаў. Мы працягнем стабілізаваць занятасць і кошты і падтрымліваць паказчыкі эканамічнага развіцця ў зададзеных значэннях".
Таксама ў Дзяржстаце расказалі аб мерах падтрымкі эканомікі. Так, у першым квартале бягуча года аб'ём крэдытаў, выдадзеных у кітайскіх юанях, вырас прыкладна на 1,3 трлн долараў, устанавіўшы новы гістарычны рэкорд. Па даных на канец сакавіка сальда па крэдытах малым і мікрапрадпрыемствам перавысіла 3 трлн долараў -- амаль на чвэрць больш, чым годам раней.
Тым часам Народны банк Кітая прыняў рашэнне знізіць стаўкі рэфінансавання для сельскагаспадарчага сектара і малых прадпрыемстваў да 2%.