Беларусь і ЮНІДА падпісалі ў Вене праграму супрацоўніцтва

Рамачная праграма супрацоўніцтва паміж урадам Беларусі і Арганізацыяй Аб'яднаных Нацый па прамысловым развіцці / ЮНІДА / падпісана ў чацвер у штаб-кватэры ЮНІДА ў Вене. Пра гэта паведамляецца на сайце беларускага МЗС.

Новая рамачная пяцігадовая праграма будзе вызначаць напрамкі далейшага пашырэння ўзаемадзеяння і сумеснай працы Беларусі з ЮНІДА з улікам прыярытэтаў сацыяльна-эканамічнага развіцця.

У МЗС назвалі сімвалічным падпісанне менавіта сёння праграмы, паколькі роўна 40 гадоў таму ў Нью-Ёрку Беларусь падпісалася пад Статутам ЮНІДА і ўвайшла ў лік краін-заснавальніц гэтай установы ААН.

Беларусь паслядоўна падтрымлівае ўмацаванне вядучай ролі ЮНІДА ў садзейнічанні ўсёахопнаму і ўстойліваму індустрыяльнаму развіццю дзяржаў свету, выкарыстоўвае экспертны патэнцыял і магчымасці арганізацыі для павышэння канкурэнтаздольнасці і экалагічнасці сваіх вытворчасцяў, укаранення сучасных тэхналогій і стандартаў.