У Беларусі ствараюць сістэму адсочвання тавараў

Прэзідэнт Беларусі Аляксандр Лукашэнка ў аўторак падпісаў указ "Аб наглядзе за таварамі", паведамляе яго прэс-служба.

Дакумент накіраваны на рэалізацыю пагаднення аб механізме нагляду за таварамі, увезеных на мытную тэрыторыю Еўразійскага эканамічнага саюза.

Дадзеная сістэма збору, уліку, захоўвання, апрацоўкі і кантролю звестак аб таварах і аперацыях, звязаных з іх абаротам, будзе рэалізоўвацца на аснове абавязковага складання суб'ектамі гаспадарання электронных накладных пры абароце асобных груп тавараў, пералік якіх будзе вызначацца Саветам Міністраў.

Указ будзе садзейнічаць павышэнню празрыстасці абароту тавараў і развіццю добрасумленнай канкурэнцыі, у тым ліку пры экспарце тавараў на рынкі дзяржаў-членаў ЕАЭС.

У цяперашні час сістэма электроннага дакументазвароту ўжываецца на добраахвотнай аснове. Па стане на лістапад 2020 года да яе было падключана 1,6 тыс. суб'ектаў гаспадарання, якімі фарміравалася больш за 3 млн накладных у год.