​Сусветная эканоміка ў гэтым годзе вырасце на 5,6% — прагноз АЭСР

9 сакавіка Арганізацыя эканамічнага супрацоўніцтва і развіцця апублікавала даклад пра перспектывы сусветнай эканомікі, згодна з якім у 2021 годзе сусветная эканоміка, як чакаецца, вырасце на 5,6%, а ключом да паслядоўнага эканамічнага аднаўлення з'яўляецца імклівае і эфектыўнае размеркаванне вакцын ад каранавіруса ў глабальным маштабе.

Згодна з прагнозам, да сярэдзіны 2021 г. глабальная вытворчасць вернецца на ўзровень да пандэміі, а ў 2022 г. сусветная эканоміка, як чакаецца, вырасце на 4%. У выпадку, калі вытворчасць вакцын будзе паскорана, а па ўсім свеце наладзіцца іх скаардынаванае размеркаванне, якое апярэдзіць распаўсюджванне новых мутацый COVID-19, то супрацьэпідэмічныя абмежавальныя меры можна будзе аслабіць хутчэй. У такім выпадку перспектывы глабальнага эканамічнага росту могуць апынуцца лепшымі, чым мяркуецца зараз.

Як прагназуюць аўтары даклада, у ЗША ў бягучым годзе эканамічны рост складзе 6,5%, а ў Кітаі — 7,8%.

У дакладзе адзначаецца, што за апошнія некалькі месяцаў многія галіны зноў пачалі сваю працу, паслядоўна пачала ажыццяўляцца вакцынацыя. Прыняты шэраг мер фінансавага стымулявання, што, верагодна, стала магутным стымулам для ажыўлення эканамічнай актыўнасці. У той жа час пандэмія пагаршае разрыў паміж рознымі эканамічнымі суб'ектамі і галінамі, аказвае асабліва моцны ўплыў на сацыяльна неабароненыя слаі насельніцтва і, верагодна, у доўгатэрміновай перспектыве падрывае перспектывы многіх людзей на рынку працы, а таксама іх узровень жыцця.

У дакладзе ўтрымліваецца заклік павялічыць маштабы вакцынацыі і прымяніць больш хуткія і адрасныя меры фінансавага стымулявання з тым, каб спрыяць росту вытворчасці, павялічваць упэўненасць і працягваць аказваць матэрыяльную падтрымку людзям і прадпрыемствам, найбольш пацярпелым ад пандэміі, а таксама закладваць аснову для ўстойлівага аднаўлення.

Генеральны сакратар АЭСР Анхель Гурыя заявіў: "Тэмпы вакцынацыі маюць ключавое значэнне. Яна павінна быць паскорана і павінна ахапіць усю планету. Дзеля гэтай мэты неабходна пашыраць міжнароднае супрацоўніцтва і каардынацыю. Толькі так мы зможам сканцэнтраваць сілы, працягнуць развіццё і закласці аснову для паслядоўнага аднаўлення сусветнай эканомікі".