Эксперты ААН па правах чалавека выказалі "глыбокае расчараванне" рашэннем Японіі скінуць радыеактыўную ваду ў акіян

Эксперты ААН па правах чалавека выказалі ў чацвер "глыбокае расчараванне" рашэннем японскага ўрада скінуць у мора радыеактыўныя сцёкавыя воды з аварыйнай АЭС "Фукусіма-1", адзначыўшы, што гэты крок можа паўплываць на жыццё і сродкі да існавання мільёнаў людзей у Ціхаакіянскім рэгіёне.

У сумеснай заяве спецдакладчык ААН па пытанні аб наступствах для правоў чалавека экалагічна абгрунтаванага рэгулявання і выдалення небяспечных рэчываў і адходаў Маркас А. Арэльяна, спецдакладчык па праве на харчаванне Майкл Фахры і спецдакладчык па правах чалавека і навакольнага асяроддзі Дэвід Бойд выказалі занепакоенасць тым, што скідванне ў акіян больш за мільён тон забруджанай вады можа аказаць сур'ёзны ўплыў на жыццё многіх людзей і навакольнае асяроддзе, а таксама стаць вельмі вялікай пагрозай для абароны адпаведных правоў чалавека.

Як гаворыцца ў заяве, японскі ўрад сцвярджае, што сцёкавыя воды былі апрацаваны з дапамогай сістэмы ачысткі ALPS для выдалення радыенуклідаў, але папярэдняя практыка паказала, што гэтая тэхналогія не цалкам ліквідуе рызыку радыеактыўнага забруджвання. Пры гэтым японскі ўрад недаацэньвае шкоду радыеактыўных матэрыялаў у сцёкавых водах АЭС, іх пагроза для чалавека і навакольнага асяроддзя можа захоўвацца больш за 100 гадоў, падкрэсліваюць эксперты.

Спецдакладчыкі ААН таксама адзначылі, што рашэнне Токіа выклікае асаблівае расчараванне, паколькі скідванне радыеактыўнай вады ў акіян не з'яўляецца адзіным спосабам яе ўтылізацыі. Японія павінна рэальна выканаць абавязацельствы па прадухіленні ўцечкі шкодных рэчываў і правесці поўную ацэнку рызык сваіх дзеянняў, каб бараніць, а не разбураць навакольнае асяроддзе, заявілі эксперты.