У. Зяленскі: Украіна хоча пазбегнуць замарозкі канфлікту ў Данбасе

Узброены канфлікт у Данбасе было б прасцей замарозіць, аднак Украіна будзе выкарыстоўваць усе магчымасці для таго, каб яго ўрэгуляваць. Пра гэта, як перадае Інтэрфакс-Украіна, заявіў у чацвер у Кіеве ўкраінскі прэзідэнт Уладзімір Зяленскі на прэс-канферэнцыі, прысвечанай вынікам двух гадоў яго працы на пасадзе кіраўніка дзяржавы.

Прэзідэнт Украіны нагадаў, што летам мінулага года ў Данбасе было абвешчана перамір'е, дзякуючы якому шэсць-сем месяцаў сітуацыя ў рэгіёне заставалася стабільнай, колькасць абстрэлаў паменшылася ў 10 разоў.

У. Зяленскі падкрэсліў, што для ўрэгулявання канфлікту ў Данбасе Украіна працягвае ўдзельнічаць у пасяджэннях Трохбаковай кантактнай групы /Украіна, Расія і АБСЕ/ і ўзаемадзейнічаць у Нармандскім фармаце /Украіна, Расія, Францыя і Германія/. У прыватнасці, нядаўна прэзідэнт Украіны правёў сустрэчу са сваім французскім калегам Эмануэлем Макронам, да якой па відэасувязі далучылася канцлер Германіі Ангела Меркель.

Асобна У. Зяленскі паведаміў, што ва Украіне можа быць праведзены рэферэндум, на які вынесуць розныя планы па ўрэгуляванні сітуацыі ў Данбасе. Пра якія менавіта планы ідзе гаворка, прэзідэнт не ўдакладніў.

Узброены канфлікт на ўсходзе Украіны працягваецца ўжо сем гадоў. Паводле звестак МЗС краіны, ахвярамі баявых дзеянняў сталі больш за 14 тыс. чалавек, яшчэ амаль 40 тыс. атрымалі раненні.