Лідары ЕС на саміце ў Брусэлі не дамовіліся па адзінай стратэгіі барацьбы з высокімі коштамі на газ

Еўрасаюзу не ўдалося ўзгадніць адзіную пазіцыю па пераадоленні энергетычнага крызісу. Раскол на двухдзённым саміце ЕС, які толькі што завяршыўся ў Брусэлі, адбыўся па лініі Поўнач-Поўдзень.

Паўночныя краіны Еўропы ўпэўненыя, што рэзкі скачок цэн на энерганосьбіты мае спекулятыўны і кароткатэрміновы характар, у той час, як паўднёвыя патрабуюць поўнага перагляду энергетычнай стратэгіі. Ніводзін бок не ставіць пад сумнеў неабходнасць пераходу да «зялёнай» энергетыкі, пытанне -- у аб'ёмах выкарыстання іншых крыніц энергіі падчас пераходнага перыяду. Канкрэтныя рашэнні даручылі падрыхтаваць Савету міністраў энергетыкі і Еўракамісіі да канца лістапада.

Прэзідэнт Францыі Эмануэль Макрон сказаў: "Сёння мы занадта залежныя ад імпарту некаторых энерганосьбітаў, чые цэны растуць у залежнасці ад напружанасці на рынках. З прагматычнага пункту гледжання ўсе мы адзначаем неабходнасць дыверсіфікацыі крыніц энергіі і ў гэтым кантэксце ядзерная энергія павінна быць часткай рашэння".

Прэзідэнт Еўракамісіі Урсула фон дэр Ляен адзначыла: "Для павышэння ўстойлівасці і незалежнасці мы пагадзіліся вывучыць магчымасць фарміравання стратэгічных газавых рэзерваў, а таксама правядзення сумесных закупак". Паводле яе слоў, "Газпром" выконвае доўгатэрміновыя абавязацельствы, але не адрэагаваў на рост коштаў спотавымі пастаўкамі, як гэта было ў папярэднія гады. У Маскве ў адказ на гэта нагадалі, што экспарт газу толькі ў Германію гэтай восенню павялічыўся на траціну. Галоўнай прычынай дэфіцыту блакітнага паліва напярэдадні ацяпляльнага сезона стала незапоўненасць еўрапейскіх падземных газасховішчаў.