СААЗ не бачыць неабходнасці ў масавай вакцынацыі ад віруса воспы малпаў

Сусветная арганізацыя аховы здароўя пакуль не лічыць неабходнай тэрміновую масавую вакцынацыю насельніцтва ад воспы малпаў. Пра гэта паведаміла агенцтва Reuters са спасылкай на прадстаўніка арганізацыі Рычарда Пібадзі. Паводле яго слоў, на сапраўдны момант можна стрымаць распаўсюджанне віруса, прытрымліваючыся некалькіх патрабаванняў. У іх пералік уваходзіць захаванне элементарных правіл гігіены і частае мыццё рук.

У панядзелак СААЗ паведамляла, што мае звесткі пра 92 пацверджаныя выпадкі захворвання на воспу малпаў. Паведамленні аб іх паступілі з 12 краін, у прыватнасці, з Аўстраліі, Бельгіі, Вялікабрытаніі, Германіі, Іспаніі, Італіі, Канады і яшчэ пяці еўрапейскіх краін. У Бельгіі ўвялі карантын для пацыентаў, у якіх дыягнаставалі воспу малпаў. Гэта першая краіна, дзе прынялі такія меры. Там знайшлі ўжо чатырох заражаных, тэрмін іх ізаляцыі складзе 21 дзень. 37 новых выпадкаў воспы малпаў выяўлена ў Вялікабрытаніі. Усяго заразіліся 57 чалавек. Брытанскае Агенцтва па ахове здароўя рэкамендавала ўсім, хто меў цесны кантакт з інфіцыраванымі, захоўваць рэжым самаізаляцыі.

Воспа малпаў – рэдкае віруснае захворванне, якое перадаецца чалавеку пераважна ад дзікіх жывёл – грызуноў і прыматаў. Сімптомы: ліхаманка, галаўныя і цягліцавыя болі, павелічэнне лімфатычных вузлоў, стомленасць і характэрны сып на скуры.