Старшыня КНР Сі Цзіньпін заклікаў членаў Азіяцка-Ціхаакіянскага эканамічнага супрацоўніцтва прытрымлівацца прынцыпаў інавацый, адкрытасці, "зялёнага" развіцця, інклюзіўнасці і ўзаемнай выгады ў садзейнічанні рэгіянальнаму развіццю. Аб гэтым ён заявіў, выступаючы на 30-й нефармальнай сустрэчы кіраўнікоў АЦЭС, якая прайшла ў Сан-Францыска 17 лістапада ў першай палове дня па мясцовым часе.

Паводле слоў кітайскага лідара, КНР па-ранейшаму адданая мірнаму развіццю, фундаментальная мэта якога заключаецца ў тым, каб даць кітайскаму народу магчымасць добра жыць, а не ў тым, каб кагосьці замяніць.

Сі Цзіньпін нагадаў, што сёлета адзначаецца 45-я гадавіна правядзення палітыкі рэформ і адкрытасці ў Кітаі.

"Мы будзем імкнуцца да высакаякаснага развіцця і адкрытасці. Кітайская мадэрнізацыя магла б дапамагчы ўнесці ўклад у мадэрнізацыю ўсяго свету ў гэту эпоху", -- адзначыў Сі Цзіньпін.

Ён заклікаў аб'яднаць намаганні для развіцця АЦЭС і дасягнення больш плённых вынікаў, а таксама для пабудовы наступных 30 “залатых гадоў” Азіяцка-Ціхаакіянскага ўзаемадзеяння.