Каб спазнаць Хоўхай, спачатку трэба даведацца пра Шычахай, вядомы з часоў дынастыі Юань. Тады ён называўся Хайцзы. Шычахай быў спецыяльна створаны для адпачынку імператарскай сям'і. Падчас праўлення менскай дынастыі Шычахай падзялілі на тры часткі: Сіхай (Заходняе мора), Хоўхай (Дальняе мора) і Цяньхай (Бліжняе мора). Ужо з тых часоў узбярэжжа Хоўхая было вядомым гандлёвым раёнам Пекіна. Возера Хоўхай знаходзіцца ў самым цэнтры сталіцы, за некалькі кіламетраў ад плошчы Цяньаньмэнь. Яно злучаецца каналам са знакамітым возерам Бэйхай. Насупраць – парк Цзіншань і музей Гугун. І нават сёння, у 21 стагоддзі, раён гэты па-ранейшаму квітнее. Тут, у хутунах, якія даўно ўжо сталі візітоўкай старога Пекіна, можна атрымаць асалоду ад даўніх традыцый і адначасова адчуць біццё пульсу сучаснага мегаполіса.
Увечары, калі заходзіць сонца і запальваюцца неонавыя лямпы, жыццё на беразе Хоўхая толькі пачынаецца. Тут знаходзіцца шмат бараў. У кожнага з іх свае адметнасці: розная атмасфера, інтэр'еры, нават ежа і напоі адрозніваюцца. У некаторых можна ціха і спакойна адпачыць, а ў іншых – весці шумнае вячэрняе жыццё. Напрыклад, у бары Цзаань (Левы бераг) стаяць вялікія ўтульныя канапы – адпачыць на іх з сябрамі у другой палове дня вельмі прыемна.