На гэты раз беларускі калектыў паказаў кітайскім гледачам іншую знакавую пастаноўку – балет "Спартак" на музыку Арама Хачатурана ў пастаноўцы харэографа -- знакамітага Валянціна Елізар'ева.
У балеце «Спартак» прымаюць удзел каля 50 артыстаў. Менавіта яны расказалі гісторыю самага вядомага паўстання супраць Рыма – правадыром якога быў высакародны фракіец Спартак, імя якога жыве ў стагоддзях.
Галоўныя партыі - Спартака, Фрыгіі і Краса - 3 і 4 мая на сцэне Нацыянальнага цэнтра выканальніцкіх мастацтваў у Пекіне выканалі бліскучыя вядучыя салісты Вялікага тэатра Беларусі: народная артыстка Ірына Яромкіна, заслужаныя артысты краіны Алег Яромкін і Канстанцін Геронік, лаўрэаты міжнародных конкурсаў Яна Штанге, Ігар Аношка і Ягор Азаркевіч.
Калі гэты спектакль з'явіўся на сцэне Вялікага тэатра Беларусі ў далёкім 1980 годзе, у Мінск сталі прыязджаць прыхільнікі балета з усёй прасторы вялізнага Савецкага Саюза - убачыць гэты шэдэўр, створаны сапраўднымі Майстрамі: кампазітарам Арамам Хачатуранам, харэографам Валянцінам Елізар'евым, дырыжорам Яраславам Вашчаком і мастаком Яўгенам Лысікам. За дзесяцігоддзі свайго існавання гэты балет пакарыў практычна ўвесь свет. Беларускім артыстам апладзіравалі гледачы Еўропы і Азіі - у Вялікабрытаніі, Бельгіі, Францыі, Швейцарыі, Галандыі, Іспаніі, Італіі, Партугаліі, Грэцыі, Польшчы, Расіі, Літве, Эстоніі, Малдове, Егіпце, Сірыі, Тайландзе, Сінгапуры, Індыі, Турцыі, Паўднёвай Карэі, Індыі, на Кіпры і ў іншых краінах.
3 і 4 траўня жыхары і госці Пекіна ўбачылі легендарны балет А. Хачатурана «Спартак», які ў 2018-м набыў другое жыццё, менавіта ў гэтым годзе пачалося існаванне спектакля ў фармаце аднаўлення. (Над новай рэдакцыяй працаваў сам харэограф-пастаноўшчык - мастацкі кіраўнік Вялікага тэатра Беларусі, народны артыст СССР і Беларусі, прафесар Валянцін Елізар'еў.)
На сёння існуюць дзесяткі версій балета «Спартак», але толькі нешматлікія з іх могуць лічыцца легендарнымі. Беларуская пастаноўка Елізар'ева, без ілжывай сціпласці, адна з такіх. Гэта сапраўды знакавы для сусветнага балета твор неверагоднай духоўнай сілы, вяршыня сапраўднага мастацтва - пышнае палатно, якое спалучае традыцыі класічнага балета, яркі, аўтарскі – елізар'еўскі - харэаграфічны почырк, глыбокае філасофскае асэнсаванне жыцця і яго каштоўнасцяў, галоўнай з якіх абвяшчаецца Любоў.
Прыхільнікі танца ў Пекіне ацанілі творчасць беларускага балета, а Валянцін Елізар'еў паабяцаў хутка вярнуцца зноў, каб працаваць на Міжнародным балетным конкурсе, арганізаваным Вялікім тэатрам Кітая ў ліпені.