У першай палове дня 3 верасня бягучага года на плошчы Цяньаньмэнь у цэнтры Пекіна адбудуцца ўрачыстасці ў гонар 70-годдзя перамогі ў вайне Супраціўлення кітайскага народа японскім захопнікам і перамогі ў Сусветнай антыфашысцкай вайне, у тым ліку ваенны парад. У той жа дзень з прамовай выступіць генеральны сакратар ЦК КПК Сі Цзіньпін. Пра гэта заявіў намеснік загадчыка Аддзела прапаганды ЦК КПК Ван Шымін на прэс-канферэнцыі.
Паводле яго слоў, 3 верасня ў сталіцы таксама пройдуць прыём і канцэрт. Важнай падзеяй стане ўзнагароджанне медалямі "70-годдзе перамогі ў вайне Супраціўлення кітайскага народа японскім захопнікам". Сі Цзіньпін асабіста ўзнагародзіць медалямі прадстаўнікоў ветэранаў і камандзіраў-удзельнікаў вайны або іх сваякоў.
Намеснік кіраўніка канцылярыі Кіруючай групы па справах ваеннага парада, намеснік начальніка аператыўнага ўпраўлення Генштаба НВАК Цюй Жуй на прэс-канферэнцыі праінфармаваў, што па плошчы Цяньаньмэнь пройдуць парадныя калоны сямі ваенных акругаў, ВМС, ВПС, Другой артылерыі, народнай узброенай паліцыі і чатырох галоўных упраўленняў НВАК. Адбудзецца таксама праходжанне гераічных частак, якія прымалі ўдзел у антыяпонскай вайне пад кіраўніцтвам КПК.
На парадзе будуць прадстаўлены ўзбраенне і ваенная тэхніка айчыннай вытворчасці, якой аснашчаны кітайскія войскі. Многія ўзоры будуць паказаны ўпершыню, адзначыў Цюй Жуй, дадаўшы, што для ўдзелу ў ваенным парадзе таксама будуць запрошаны замежныя вайскоўцы.
Ван Шымін адзначыў, што з 7 ліпеня ў Кітаі пройдзе серыя мерапрыемстваў у гонар 70-годдзя перамогі, у тым ліку тэматычная выстава, міжнародны навуковы семінар, цырымонія ўдараў у звон і грамадзянская паніхіда па ахвярах вайны. 0-