Харчовы рынак Кітая мае патрэбу ў рэформах, накіраваных на павышэнне эфектыўнасці прапановы. Такое меркаванне выказаў у нядзелю на "палях" штогадовай сесіі Усекітайскага камітэта НПКСК член камітэта, кіраўнік канцылярыі Цэнтральнай кіруючай групы па працы на вёсцы Чэнь Сівэнь.

Як ён адзначыў, цяпер на харчовым рынку Кітая адначасова назіраюцца дзве процілеглыя адна адной з'явы -- "багацце" і "недахоп". Казаць пра "багацце" дазваляе істотны рост валавога збору збожжа -- з 430,7 млн тон у 2003 годзе да 621,4 млн тон у 2015-м. Але, нягледзячы на тое, што павелічэнне аб'емаў вытворчасці збожжа адзначаецца ўжо 12-ы год запар, для поўнага задавальнення патрэбаў краіны патрабуецца штогод імпартаваць яшчэ 20 млн. тон збожжавых, нагадаў Чэнь Сівэнь.

Асноўныя для Кітая харчовыя культуры -- пшаніца, рыс, кукуруза, соевыя бабы і клубняплоды. Аднак іх вытворчасць аказваецца нераўнамернай: дзе лішак, а дзе недахоп.

Такая сітуацыя, лічыць Чэнь Сівэнь, -- сведчанне існуючай паміж прапановай і попытам супярэчнасці па асартыменце. Акрамя таго, адзначыў ён, з-за высокіх выдаткаў вытворчасці і дарагоўлі кітайскае харчаванне мала канкурэнтаздольнае на міжнародным рынку.

Паводле яго слоў, рэформы павінны быць накіраваныя на рашэнне трох задач: забеспячэнне агульнай збалансаванасці прапановы і попыту на харчовыя культуры, урэгуляванне структуры асартыменту і зніжэнне выдаткаў вытворчасці за кошт навукова-тэхнічных інавацый.