Узаемны доступ да таргоў адкрылі сёння Шэньчжэньская і Сянганская фондавыя біржы. Цырымонія запуску механізму, які дазваляе інвестарам прадаваць і купляць акцыі на біржы іншага боку, прайшла ў прысутнасці кіраўніка адміністрацыі Спецыяльнага адміністрацыйнага раёна Сянган Лян Чжэньіна. Ён расцаніў гэтую падзею як дасягненне мясцовым і Шэньчжэньскім рынкамі капіталу новага ўзроўню ўзаемазвязанасці. Відавочна яго значэнне для павышэння двухбаковай адкрытасці кітайскага фінансавага сектара, а таксама інтэрнацыяналізацыі юаня, адзначыў ён. "Гэта ўзаемавыгадны крок. Сянган гатовы і надалей уносіць сваю лепту ў рэформу фінансавай сістэмы ўнутраных раёнаў", - дадаў кіраўнік адміністрацыі. Адкрыццё перакрыжаваных таргоў паміж Шэньчжэнем і Сянганам адбылося пасля двух гадоў стабiльнай працы падобнага механізму на Сянганскай і Шанхайскай фондавых біржах. Яно стала вынікам сумесных намаганняў усіх бакоў, заявіў адміністрацыйны дырэктар Сянганскай біржы Лі Сяацзя. Як ужо было даказана, тыражыраваць гэтую мадэль можна, яна жыццяздольная, сказаў ён.