За апошнія два гады Украіна ажыццявіла "беспрэцэдэнтныя" па сваім маштабе рэформы ў сацыяльна-эканамічнай і палітычнай сферах. Пра гэта гаворыцца ў апублікаваным сёння дакладзе Еўрапейскай камісіі і Вярхоўнага прадстаўніка ЕС па замежных справах і палітыцы бяспекі.
Сярод галоўных дасягненняў краіны аўтары дакладу выдзелілі крокі, прынятыя ёю для барацьбы з карупцыяй. У прыватнасці, ва Украіне былі створаны новыя антыкарупцыйныя інстытуты, а таксама ўведзеныя ў дзеянне электронная сістэма дзяржзакупак ProZorro і сістэма электроннага дэкларавання даходаў дзяржчыноўнікаў.
Акрамя гэтага, украінскія ўлады змаглі узмацніць незалежнасць судоў, запусціць працэс дэцэнтралізацыі, навесці парадак у банкаўскай сістэме, пачаць маштабныя пераўтварэнні ў энергетычным сектары і выканаць усе патрабаванні для атрымання бязвізавага рэжыму з ЕС.
У той жа самы час у Брусэлі мяркуюць, што ў асобных сферах рэформы праводзіліся недастаткова хуткімі тэмпамі. У прыватнасці, гаворка ідзе пра прыватызацыю дзяржаўных прадпрыемстваў і адмену мараторыя на продаж сельгасзямель. Акрамя таго, Украіне варта актывізаваць намаганні па аздараўленні бізнес-клімату, паляпшэнні сістэмы аховы здароўя і сацыяльнай абароны.