Дзяржсавет КНР сёння паведаміў, што будзе ўмацоўваць сертыфікацыю якасці для садзейнічання фарміраванню справядлівых рынкавых умоў і павышэння якасці вырабленай у Кітаі прадукцыі.

Кітай будзе ўдасканальваць сваю сістэму кантролю якасці, каб забяспечыць яе адпаведнасць характарыстыкам розных індустрый. Увага будзе засяроджана на сектарах авіяцыі, чыгункі, аўтамабільнай прамысловасці і інфармацыі. Пра гэта паведамляецца ў заяве, апублікаванай пасля чарговага пасяджэння Дзяржсавета, што прайшло пад старшынствам прэм'ера Дзяржсавета КНР Лі Кэцяна.

Урад будзе пашыраць ахоп сертыфікацыяй якасці і заахвочваць праходзіць сертыфікацыю ўсе віды кампаній, асабліва правайдэраў паслуг, малыя і мікрапрадпрыемствы.

Абавязковая сертыфікацыя будзе патрабавацца ад прадукцыі, якая закранае бяспеку, ахову здароўя і абарону навакольнага асяроддзя. Для стымулявання прадпрыемстваў да праходжання добраахвотнай сертыфікацыі будуць прымяняцца заахвочванні, гаворыцца ў заяве.

Кітай таксама вывучыць новыя метады кантролю стандартаў якасці, створыць строгія стандарты сертыфікацыі і будзе імкнуцца да міжнароднага супрацоўніцтва для ўзаемнага прызнання стандартаў, дадаецца ў заяве.