Не менш за 30 гарнякоў загінулі, яшчэ 13 прапалі без вестак у нядзелю ў выніку апоўзня на поўначы Філіпін. Пра гэта паведаміў камандуючы Узброенымі сіламі Філіпін на поўначы вострава Лусон Эмануэль Саламат.
Паводле яго слоў, 43 чалавекі былі заблакіраваны ў тунэлі з-за апоўзня, выкліканага магутным тайфунам "Манхут", які абрынуўся на астраўную дзяржаву раніцай у суботу.
На месцы здарэння працягваецца пошукава-выратавальная аперацыя. Колькасць ахвяр стыхіі на Філіпінах узрасла да 59 чалавек.
"Манхут" -- 15-ты тайфун, які абрынуўся ў бягучым годзе на Філіпіны. Ён стаў самым магутным з пачатку года. - Р -