/"Сіньхуа"/ Вярхоўная Рада ў панядзелак ухваліла ўказ прэзідэнта Украіны Пятра Парашэнкі аб увядзенні ваеннага становішча з-за абвастрэння сітуацыі ў раёне Керчанскага праліва. Гэта рашэнне падтрымалі 276 дэпутатаў пры неабходным мінімуме ў 226 галасоў, паведамляе прэс-служба парламента.
Указ пра абвяшчэнне ваеннага становішча быў падпісаны Парашэнкам раней у панядзелак. Ён прадугледжваў увядзенне асаблівага прававога рэжыму на 60 дзён. Аднак пасля кансультацый з парламенцкімі фракцыямі тэрмін дзеяння ваеннага становiшча быў скарочаны ўдвая. Абноўлены ўказ уступіць у сілу 28 лістапада ў 9 гадзін раніцы па кіеўскім часе.
Выступаючы ў Вярхоўнай Радзе перад пачаткам галасавання, П.Парашэнка заявіў, што адмысловы прававы рэжым будзе дзейнічаць не на ўсёй тэрыторыі Украіны, а толькі ў абласцях, якія мяжуюць з Расіяй і Прыднястроўем, а таксама размешчаныя на ўзбярэжжы Чорнага і Азоўскага мораў.
Нагадаем, прычынай, якая падштурхнула ўлады Украіны ўвесці ваеннае становішча, стаў інцыдэнт, які адбыўся 25 лістапада ў раёне Керчанскага праліва. Як паведамілі ВМС Украіны, РФ абстраляла, а затым захапіла тры ўкраінскіх ваенныя караблі. Яны накіроўваліся з чарнаморскага порта "Адэса" ў порт "Марыупаль", размешчаны на ўзбярэжжы Азоўскага мора. У Маскве сцвярджаюць, што суны незаконна ўвайшлі ў расійскія тэрытарыяльныя воды, аднак Украіна настойвае на тым, што заяўка на праход суднаў была пададзена. - Р -