Другая канферэнцыя высокага ўзроўню ААН па супрацоўніцтве Поўдзень-Поўдзень у сераду адкрылася ў сталіцы Аргенціны. Яе ўдзельнікі лічаць, што супрацоўніцтва Поўдзень-Поўдзень гуляе важную ролю ва ўрэгуляванні шматлікіх праблем у сучасным свеце, і заклікаюць усе бакі і далей умацоўваць узаемадзеянне ў гэтым накірунку.
У сваім выступленні на канферэнцыі генеральны сакратар ААН Антоніу Гутэрыш станоўча ацаніў уклад супрацоўніцтва Поўдзень-Поўдзень у садзейнічанне збавенню чалавецтва ад крайняй галечы, хуткі эканамічны рост у краінах, якія развіваюцца, і дасягненне глабальных стандартаў у галіне ўстойлівага развіцця.
Паводле яго слоў, цяперашняя канферэнцыя з'яўляецца толькі стартам, які прадастаўляе яе ўдзельнікам магчымасці далейшага развіцця і ўмацавання рамак узаемадзеяння. Пры агульных намаганнях усіх краін свету можна выканаць мэты ўстойлівага развіцця, пераадолець выклікі змены клімату і палепшыць жыццё народаў усіх краін планеты.
Старшыня Генеральнай Асамблеі ААН Марыя Фернанда Эспіноса Гарсес заявіла, што супрацоўніцтва Поўдзень-Поўдзень збліжае розныя дзяржавы. Яно не служыць заменай супрацоўніцтву паміж Поўначчу і Поўднем, а дапаўняе і ўзбагачае яго змест.
Канферэнцыя высокага ўзроўню ААН па супрацоўніцтве Поўдзень-Поўдзень прызначана для ўмацавання партнёрскіх адносін паміж усімі зацікаўленымі бакамі, далейшага садзейнічання каардынацыі і ўзаемадзеянню паміж бакамі, якія развіваюцца, і бесперапыннага ўмацавання ролі супрацоўніцтва Поўдзень-Поўдзень і трохбаковага супрацоўніцтва ў працэсе рэалізацыі Парадку дня ў галіне ўстойлівага развіцця на перыяд да 2030 года.